Aasiannut sukannersumik suli ukkatarinninneq: 15-it tunillatsissimasinnaasut
Aasianni innuttaasut coronavirusimut atatillugu suli mianersorluassapput.
Naak coronamik tunillatsissimasup ilaqutaata coronavirusimik tunillatsissimannginnera tallimanngornermi paasineqaraluartoq allat suli tunillatsissimasinnaapput.
Nakorsaaneq, Henrik L. Hansen KNR-imut taama paasissutissiivoq. Inuimmi amerlasuut tunillatsissimasumut qanillisimapput, taamaattumillu namminneq aamma napparsimaleratarsinnaapput.
AAMMA ATUARUK Corona pillugu malittarisassat unioqqutinnerisa kingunerat: 3-4.000 koruuninut akiligassiineq
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
- Angerlarsimaannartitaagallarput, tamatuma kingorna napparsimmavimmi misissorneqarnissamut periarfissaqassapput, taamaalillunilu tunillatsissimanersut paasineqarsinnaassalluni, nakorsaaneq oqarpoq, nangillunilu:
- Sapaatinili akunnerni tulliuttuni Aasianni suli sukannersumik ukkatarinnittoqassaaq, pissutigalugu tunillatsissimasup isersimanerata kingunerisaanik nutaanik allanik takkuttoqaratarsinnaammat.
Inuit 15-it tunillatsissimasumut qanillisimasut
Inuit pineqartut maanna angerlarsimaannartinneqartut katillugit 15-iupput. Taakku tamarmik ataatsimoorlutik tunillatsissimasumut qanillisimapput.
- Kikkut tunillatsissimasinnaanersut pillugit paasissutissiilluartoqarpoq, tunillatsissimasinnaasullu tamarmik maanna angerlarsimaannartitaalersimasoraagut.
- Nakkutigilluarneqarpoq, kisianni isumannaavissinnaanngisaannarparput. Taamaammat maanna innersuussuteqarnissaq aamma angerlarsimaannartussaanngitsunut, covid-19-imik ersiuteqalersut misissortinniarlutik peqqinnissaqarfimmut saaffiginninnissaat pisariaqarpoq, nakorsaaneq oqarpoq.
AAMMA ATUARUK Tunillatsissimasumut Aasianniittumut ilaqutaasoq tunillatsissimanngitsoq
Tunillatsissimasup Aasianniittup sisamanngornermi ualikkut paasineqarnerani oqartussat ulapputilerput.
Tunillatsissimasummi qanillisimasaa ataaseq Nuummut Inatsisartut Aningaasaqarnermut ataatsimiititaliaanut sinniisutut ataatsimiigiarluni angalavoq. Tamatuma kingunerisaani ataatsimiititaliami ilaasortat tamarmik angerlarsimaannartussanngortinneqarput.
Ilaqutaasorli taanna tunillatsissimanngitsutut uppernarsarneqartoq tallimanngormat ullaap tungaani saqqummiunneqarpoq. Taamaakkaluartorli taanna suli angerlarsimaannarallassaaq ullullu arfineq-marluk qaangiuppata misissorteqqissalluni.
AAMMA ATUARUK Tamaat isigalugu: Coronavirus pillugu killiffik
Tuniluuttoqalinnginnissaa pillugu oqartussat Aasianni utaqqiisaasumik suliniuteqarput.
- Pisariaqanngitsumik aarlerinartorsiortitsisoqarnissaa pinaveersaarniarlugu – maannakkuugallartoq – utoqqaat illuannut pulaartoqarsinnaanngilaq, aamma Aasianni napparsimmavimmi uninngasut pulaartoqarnissaat periarfissaanngilaq.
