Corona pillugu malittarisassat unioqqutinnerisa kingunerat: 3-4.000 koruuninut akiligassiineq
Coronamik tunillatsissimasoq Aasianniippoq. Pineqartorlu nunatsinnut tikinnerminit ulluni tallimani angerlarsimaannartussaavoq – taannalu misissorteqqinnermi akissutersinnginnerani pulaartoqarsimavoq.
Taamaammat inunnut allanut tunillaasimasinnaavoq.
Tunillatsissimasumut malittarisassanik malinnissimanngitsumut kinguneqartitsisoqassava?
Apeqqut taanna Naalakkersuisut siulittaasuata, Kim Kielsenip nakorsaanerulluunniit tusagassiortunik ippassaq katersortitsinermi akerusunngilaat.
Paragraf 8: ”Inuit Kalaallit Nunaannut tikittut Covid-19-imik tunillanneqarsimannginnertik uppernarsaqqaarnagu aaqqissuussanut, nalliuttorsiornernut, sammisaqartitsinernut assigisaannulluunniit peqataaqqusaanngillat. Matumani illup iluani, silami, pisortat inuillu katerittarnerat, aqqissuussinerit pisussallu il.il. pineqarput.
Paragraf 11: ”Unioqqutitsisoq pinerluttulerinermik inatsit malillugu pineqaatissinneqarsinnaavoq.
Taakku politimesteri, Bjørn Tegner Bay innersuussutigaa. Taannalu oqaaseqarusuppoq – kisianni nalinginnaasuinnarmik, tassa imaappoq Aasianni pisoq immikkut oqaaseqarfiginiarnagu erseqqissaatigaa.
Pisiniarfiup piginnittuanut akiligassiisoqarnikuusoq
Bjørn Tegner Bayip oqarnera naapertorlugu akiligassiisoqarsinnaaneranut periarfissaqarpoq. Taamaattoqareernikuuvorlu, tassa Nuummi pisiarfiutillip coronamut malittarisassat eqqarsaatigalugit pisiniarfimminik ilusilersuinnginnera pissutigalugu taanna akigassinneqarnikuuvoq.
Suliamilu nunatsinnut tikittup angerlarsimaannarnissamut malittarisassanik malinnginnerani aamma akiligassiisoqarsinnaavoq.
AAMMA ATUARUK Tamaat isigalugu: Coronavirus pillugu killiffik
Tamanna pissutigalugu 3-4000 koruuninik akiligassiisoqarsinnaavoq.
Tunillatsissimasorlu Aasianniittoq taama akiligassitsilernersoq Bjørn Tegner Bayip oqaaseqarfigerusunngilaa. Kisianni:
- Nuatsinnut angalanermi nunatsinnilu susinnaaneq susinnaannginnerlu pillugit nalunaarutip piumasaqaatai ersarilluarput, politimesteri oqarpoq.
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
- Politiinit ersarilluinnartumik paasinninneranni nunatsinnut angalanermi aalajangersakkat unioqqutikkaanni assersuutigalugu angerlarsimaffimmi kateritsitsineq, taava tamanna pinerluttulerinermi inatsit eqqarsaatigalugit akisussaaffeqarfiuvoq, politimesteri oqarpoq.
AAMMA ATUARUK Nyt tilfælde af covid-19 i Aasiaat
Malittarisassallu ilumut uniooqqutinneqarsimanersut politiit misissuiffigissavaat.
- Nalunaarummik unioqqutitsisoqarsimanera paasigutsigu taava malittarisassat unioqqutinneqarsimanersut misissuiffigalugit aallartissavarput. Unnerluussisussaatitaasutullu malittarisassanik unioqqutitsisoqartutut naliliigutta pineqartoq akiligassinneqassaaq, Bjørn Tegner Bay oqarpoq.
Aningaasaqarnermut ataatsimiititaliamit ilaasortat angerlarsimaannartut
Inuk pineqartoq tunillatsissimasumut Aasianni pulaarsimasoq, pulaarermi kingorna Nuummukarpoq, taannalu Aningaasaqarnermut ataatsimiititaliami illoqarfiit pingaarnersaanni pingasunngornermi ualikkut ataatsimiippoq.
Tunillatsissimasoq nammineq Nuummiinngilaq. Taamaallaalli tunillatsissimasumut pulaarsimasoq Nuummiilluni.
AAMMA ATUARUK Aasianni coronamik tunillatsissimasoqartoq: Aningaasaqarnermut ataatsimiititaliamut ilaasortat angerlarsimassasut
KNR-ip paasissutissarsiai naapertorlugit taakku akornanni qanimut attaveqatigiittoqarpoq.
Taamaammat Aningaasaqarnermut ataatsimiititaliami ilaasortat pingasunngornermi atatsimeeqataasut maanna angerlarsimaannaqqusaapput. Tamanna ataatsimiititaliap siulittaasuata tulliata, Múte B. Egedep (IA) paasissutissiissutigaa.
