Aasianni coronamik tunillatsissimasoqartoq: Aningaasaqarnermut ataatsimiititaliamut ilaasortat angerlarsimassasut

Inatsisartut aningaasaqarnermut ataatsimiititaliaannut ilaasortat ullumi angerlarsimaannassapput. Ataatsimiititaliap siulittaasuata tulliata Múte B. Egedep tamanna uppernarsarpaa.

Coronavirusimik Aasianni tunillatsittoqarsimanerata ippassaq paasineqarnera tamatumunnga pissutaavoq. Tunillatsissimasup nunatsinnut tikinneranit ullut tallimat qaangiuttut misissorteqqinnermini tunillatsissimasoq paasineqarpoq. KNR-ip paasisai naapertorlugit tunillatsissimasoq aningaasaqarnermut ataatsimiititaliamik ippassaq ataatsimeeqateqartumut qanigisaavoq.

Aningaasaqarnermut ataatsimiititaliaq Aasiannit ataatsimiigianik Nuummi ippassaq ualikkut sisamanut ataatsimeeqateqarpoq. Tunillatsissimasorlu ataatsimiigiartumut qanimut atassuteqartuusimavoq. Tunillatsissimasoq Nuummiissimanngitsoq, nunatta nakorsaanera tusagassiortunik katersortitsinermi oqarpoq.

- Angerlarsimaannarnissatsinnik qinnuigineqarnerput ilumoortoq uppernarsarsinnaavara. Ippassaq ualikkut taama paasitinneqarpugut, Múte B. Egede KNR-imut oqarpoq.

Aningaasaqarnermut ataatsimiititaliamut ilaasortat angerlarsimaannassammata, Inatsisartut ullumikkut ataatsimiissanngillat.

Tusagassiortunik suliaq pillugu nalunaaqutaq qulinut katersortitsisoqassaaq, taannalu knr.gl-ikkut KNR tv-kkut radiukkullu malinnaaffigisinnaavat.