Coronamik tunillatsissimasumik Aasianni uppernarsaasoqaqqittoq
COVID-19-imik tunillatsissimasumik nutaamik Aasianni ullumi uppernarsaasoqaqqippoq.
Tunillatsissimasoq Danmarkimit nunatsinnut angalasimavoq, nakorsaanerullu pineqartup angerlarsimaannarnissamut malittarisassat malissimagai nalunaarutigaa.
Tunillatsissimasoq napparsimanerminik ersiuteqanngilaq. Tunillatsissimasoq nunatsinnut tikinnermit ullut tallimat qaangiunneranni pisussaaneq malilluni misissorteqqinnermi paasineqarpoq.
AAMMA ATUARUK Corona pillugu aqutsisoqarfik: Aasianni allanik killilersuisoqassanngilaq
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
- Piffissap sivikitsup ingerlanerani tunillatsissimasunik pingasunik nassaarpugut. Maanna Kalaallit Nunaanni tunillaassueriaannaaneq ersarissorujussuanngorpoq, Namminersorlutik Oqartussat allapput.
Nunarput sapaatip-akunnera tunillatsissimasoqarfiunngitsoq
Nunatsinni coronamik tunillatsissimasuerunneranit sapaatip-akunnera qaangiutinngilaq.
Kingullermik tunillatsissimasumik oktobarip ulluisa 21-anni uppernarsaasoqarpoq - taanna aamma Aasianniippoq.
Taakkuli akornanni assigiinngissuteqartoqarpoq: Kingullermik tunillatsissimasup angerlarsimaannarnissamut malittarisassat malinnikuusimanngilai.
Tassa tunillatsissimasup angerlarsimaannarnissamut malittarisassat malissimanngilai. Tunillatsissimasorlu ulluni tallimani angerlarsimaannartussaatitaanermini pulaartoqartarsimavoq, tamatumalu kingulerisaanik assigiinngitsut sunniivigineqarput: Inatsisartuni aningaasaqarnermut ataatsimiititaliaq sillimaniarneq pissutigalugu angerlarsimaannartussanngortinneqarpoq, tassanilu tunillatsissimasumut qanillisimasoq Nuuliarluni Aningaasaqarnermut ataatsimiiitaliamik illoqarfiit pingaarnersaani ataatsimeeqateqarsimanera pissutaalluni.
Sisimiuni KTI-mi atuartut 80-it aamma angerlaannartinneqarpoq, tassanilu atuartunit ataatsip tunillatsissimasumut Aasianniittumut aamma qanillisimanera pissutaavoq.
Allanut qanillissannginneq
Tunillatsissimasoq taanna sapaatip-akunnerata ataatsip matuma siorna peqqisseqqissimasutut nalunaarutigineqarpoq.
- Kalaallit Nunaanni tuniluuttoqannginnissaa anguniarneqassappat, angerlarsimaannarnissamut aalajangersakkat tamarmik malinneqarnissaat pingaaruteqarluinnarpoq. Tikittut tamarmik sivikinnerpaamik ulluni tallimani angerlarsimaannassapput, aatsaallu misissorteqqinnermi tunillanneqarsimannginneq akissutigineqarpat anisassallutik. Piffissami angerlarsimaannarfiusumi tikittut allanit qanillineqannginnissaat pingaaruteqarluinnarpoq, Namminersorlutik Oqartussat paasissutissiipput.
AAMMA ATUARUK - Oqarusunnarpoq: Qaa, maleruaqqusat malilaarsigit kisimiinngilasi, inuiaqatigiit ikittunnguuvugut
Tunillatsissimasoqarnera pillugu tallimanngorpat tusagassiortunik katersortitsisoqassaaq.
Nunatsinni tunillatsissimasutut uppernarsarneqarsimasut maanna katillugit 18-iulerput. Tunillatsissimasunit 17-it peqqisseqqissimapput - taakkunanngalu arlaannaanilluunniit napparsimmavimmut uninngatitsisoqarsimanani.
