Aasianniittumik tunillatsissimasoqartoq misigineqareernikuuvoq.

Maajimi tunillatsissimasoqarpoq, maannalu aamma peqaqqilluni.

Siullermituulli coronamik tunillatsissimasoq nunatsinnut tikittoq Københavnimi timmisartorsuarmut ikinnginnermini tunillatsissimannginnermut uppernarsaateqarsimavoq.

Tunillatsissimasullu tikinnerminit ulluni tallimani angerlarsimaannarnermini allanut akulerutinnginnissamut malittarisassat malissimanngikkai ippassaq saqqummiunneqarpoq.

Tunillatsissimasoq Aasianni napparsimmavimmi misissorteqqippoq. Assi: KNR

Tunillatsissimasoq pulaartoqarsimavoq – pulaarsimasorlu Inatsisartut aningaasaqarnermut ataatsimiititaliaani sinniisutut pingasunngornermi ualikkut ataatsimeeqataavoq. Nuummullu angalasup pulaarsimasaa covid-19-imik tunillatsissimasoq tamatuma kingorna paasineqarpoq. Taamaammat Aningaasaqarnermut ataatsimiititaliami ilaasortat tamarmik pingasunngornermi unnukkut angerlarsimaannartussanngortinneqarput.

Aamma Sisimiuni Sanaartornermik Ilinniarfimmi atuartut 80-it tallimanngornermi angerlartinneqarput. Atuartuniimmi ataatsip tunillatsissimasoq qanillisimavaa.

AAMMA ATUARUK Corona pillugu malittarisassat unioqqutinnerisa kingunerat: 3-4.000 koruuninut akiligassiineq

Tamanna Aasianni aqqusinerni tusakatanneqarpoq.

- Soorunalimi, sakkortuumik oqaatigalugu kamannarpoq, soorlu inuit ilaat allat eqqarsaatigalugit, isaasalerlugu pisuussuteqanngitsut aamma eqqugaariataarsinnaapput, siaruaannerujussuaq pileriasaarsinnaavoq, tamakkua eqqarsaatigalugit iluaappoq, imaalinarluni: Qaa, maleruaqqusat malilaarsigit kisimiinngilasi, inuiaqatigiit ikittunnguuvugut immitsinnut paarisariaqarpugut, Tina Lange Olsen KNR-imut oqarpoq.

- Imatut annerusumik eqqarsaatiginngilara, soorunalimi eqqarsaameqqinnalaaraluarpoq; nåe, sissuernerulaaleqqittariaqarpunga, uffa ulluinnarsiutigilereernikuullugit soorlu errorluarnerit spriternerit tamakkua.

Alfred Brandt. Assi: KNR

Tunillatsissimasup angerlarsimaannaqqusaanermi maleruaqqusanik malinnissimannginnera aamma nuannaarutiginngilaa.

- Soorunami mianersortariaqarpugut tamatta taanna pisussaaffigaarput eqqaamaanassavarput immitsinnut paarinissarput, Afred Brandt oqarpoq.

AAMMA ATUARUK Tamaat isigalugu: Coronavirus pillugu killiffik

Tunillatsissimasumut Aasianni qanillisimasup Nuummut angalasimasup coronamik tunillatsissimannginnera tallimanngornermi ullup-qeqqata eqqaani saqqummiunneqarpoq.

Taamaammat Aningaasaqarnermut ataatsimiititaliami ilaasortat angerlarsimaffimminnit aneqqusaaleqqipput. Aamma Sisimiuni Sanaartornermik ilinniarfimmi atuartut ataasinngornermi atuariartoqqissapput.