Soraarsitsineq akiligassiinerlu: Inuit sisamat coronamut atatillugu unioqqutitsisimasutut unnerluutigineqartut

Angutit 20-t 24-llu akornanni ukiullit nunatsinnut tikinnerminni coronamut maleruaqqusanik unioqqutsitsipput. 

Taakku tamarmik 6.000 koruuninik akiligassinneqarput - sulisitsisuminnillu MT Højgaardimit soraarsinneqarput. 

Kalaallit Nunaanni politiit taama paasissutissiipput.

Taakku tamarmik sulisitsisuminnit atorfinitsinneqarnerminnut atatillugu aningaasartuutigineqartut akilissagaat piumaffigineqarput.

Angutit sisamat Danmarkimiit nunatsinnut februaarip aallartilaarnerani tikinnerminni maleruaqqusanut unioqqutitsisimasutut unnerluutigineqarput.

Ullorlu taanna tikinnerminni qanermut assiaquteqanngillat, ulluinnarni niuertarfinnut niuerniarsimapput sulilu angerlarsimasussaanermi nalaanni nukkassartarfimmut Fitness.gl-imiissimapput.

AAMMA ATUARUK Inuit pingasut angerlarsimaannaqqusaanermi unioqqutitsisut akiligassinneqartut

Arlaannaalluunniit covid-19-imik tunillanneqarsimanngillat.

Politiit misissuinerannut atatillugu suliffeqarfiit videonik immiussanik tunniussineratigut, unioqqutitsisimasut paasineqarput.

 Paasiniaanerup ingerlanerani sulisitsisoq MT Højgaard attavigineqarpoq. Kinguneralu soraarsinneqarput, suliartornissamut isumaqatigiissut atorunnaarsinneqarluni, kiisalu atorfinitsitsinermut atatillugu aningaasartuutit matussusernissaannik piumaffigineqarlutik.

AAMMA ATUARUK Angerlarsimaannarnissamut malittarisassanik malinninngitsoq akiligassitsittoq

Politiit innuttaasunut unneqqarissunut ikiuukkusuttunullu qujassuteqarput, aatsaammi tikerlaanik angerlarsimaannaqqusaanermik maleruaqqusanut unioqqutitsisoqanngilaq.  

-  Uani pisumi ersersinneqaqqippoq, tikinnermi angerlarsimaannarnissamut maleruaqqusat malinneqarnissaat qanoq pigaaruteqartiginersut. Pingaarnerpaavorlu covid-19-ip nunatsinni tuniluutilinnginnissaa, politimesteri, Bjørn Tegner Bay, tusagassiuutinut taama allappoq.