Inuit pingasut angerlarsimaannaqqusaanermi unioqqutitsisut akiligassinneqartut

Inuit pingasut Nuummiu, Paamiormiu Maniitsormiorlu, nunatsinnut tikinnerminniit angerlarsimaannarnissamik maleruaqqusanik malinnissimanngitsutut sapaatip akunnerani uani akiligassinneqarput.

Taakku tamarmik immikkut 3.000 koruuninik, 3.000 koruuninik 6.000 koruuninillu akiligassinneqartut.

Kalaallit Nunaanni politiit paasissutissiipput.

Taakkunani ataaseq imerniartarfimmiissimavoq, ataaseq festertut akornanniissimavoq. Taakku marluullutik nunatsinnut tikinnerminniit ullut pingajussaani taamaaliorput.

AAMMA ATUARUK Angerlarsimaannarnissamut malittarisassanik malinninngitsoq akiligassitsittoq

Pingajuat pisortat suliffeqarfiutaanni sulisuuvoq, taanna tikinnerminiit ullut pingasut sisamallu qaangiunneranni ulloqeqqaanerani allaffimmiissimavoq.

- Akiuussutissalersuileruttornitta nalaaniileraluarpugut, kisianni tuniluutsitsilernissamut suli aarlerinartumik inissisimavugut. Taamaammat nunatsinnut tikittunut maleruaqqusat tamavimmik malinneqaqqissaarnissaat pingaaruteqartorujussuuvoq. Taamaaliornikkummi tuniluuttoqalernissaa pinaveersaartinneqarsinnaammat, politimester, Bjørn Tegner Bay tusagassiutinut nalunaarummi allappoq.

Angerlarsimaannarnissamik maleruaqqusat suli atuupput

Maleruagassat imaapput: Nunatsinnut tikinnermiit ullut tallimat angerlarsimaannaqqusaaneq, ullullu tallimat qaangiunneranni misiligummik tigusivigineqarnermi tunillatsissimannginnermik uppernarsaammik pereernerup kingorna aatsaat inuit akornannut akuleruttoqaqqusaavoq. Ullullu tallimat ingerlaneranni pisuttuartoqarsinnaavoq, nalunngisanullu pisiniutsissinnaanermik aperisoqarsinnaalluni.

Allanut pulaartoqaqqusaanngilaq, aaqqissuussanut peqataasoqaqqusaanngilaq, bussinut taxanullu ilaasoqaqqusaanngilaq, suliartortoqaqqusaananilu.

Tikinnermiit ullut tallimat qaangiunneranni misissortikkusunngikkaanni sapaatit akunnerni marlunnik angerlarsimaannaqqusaavoq.