Angerlarsimaannarnissamut malittarisassanik malinninngitsoq akiligassitsittoq
Arnaq 20-nik ukiulik Nuummeersoq nunatsinnut tikinnermini angerlarsimaannarnissamut malittarisassanik malinninnginnini pissutigalugu akiligassinneqarpoq.
Kalaallit Nunaanni Politiit tusagassiuutinut nalunaarummi paasissutissiipput.
Arnaq Danmarkimit tikippoq, taannalu Namminersorlutik Oqartussat malittarisassaat maapertorlugit ulluni tallimani angerlarsimaannartussaavoq. Arnarli inuusuttoq angerlarsimaannarnissamini imerniartarfiliarsimavoq, politiit paasissutissiipput, taamaammat arnaq 3.000 koruuninik akiligassinneqarpoq.
20-nik ukiulik tikinnerminit ullut tallimat qaangiuttut misissorteqqippoq. Misissorteqqinneratalu tunillatsissimanngitsoq uppernarsarpaa.
AAMMA ATUARUK 16.000 koruuninik akiligassinneqartoq: 18-inik ukiulik coronamut malittarisassanik malinnissimanngitsoq
Tamannali akiligassiinermut allannguutaanngilaq.
Piffissami aggersumi juullip tungaanut Danmarkimit tikittut tunillaassuuttoqarnissaanut pinaveersaartitsisunik malittarisassanik malinninnissaat immikkut ittumik pingaaruteqarpoq, politimesteri, Bjørn Tegner Bay oqarpoq.
- Kalaallit Nunaanni Politiit ilimagaat ataatsimoorluta covid-19-ip ilungersunartorsiortitsinera qaangersinnaassagipput, innuttaasulli malittarisassanik malinninngitsunut qisuariarnissatsinnut akiligassiinissatsinnullu piareersimavugut.
- Nunatsinni tunillaassuuttoqannginnerani iluatsitseqqavugut, tamannalu pillugu innuttaasut oqartussat killilersuinerannik malinnittut qutsavigisinnaavagut, politimesteri, Bjørn Tegner Bay oqarpoq.
AAMMA ATUARUK Tamaat isigalugu: Coronavirus pillugu killiffik
Angerlarsimaannarnissamut malittarisassanik malinninngitsunut aatsaat siullermeertumik akiligassiisoqanngilaq.
Arnaq 18-inik ukiulik Nuummeersoq qaammat kingulleq aamma akiligassinneqarpoq. Taanna Danmarkimit tikinnermit angerlarsimaannarnissamut malittarisassanik sisamariarluni malinninngitsutut unnerluutigineqarpoq.
Arnaq angerlarsimaannartussaagaluarluni inuit allat pingasoriarluni ilagisimavai.
Tamatumalu saniatigut hashimik tigummiaqarnerminut aamma unnerluutigineqarpoq. Arnaq taanna 16.000 koruuninik akiligassinneqarpoq.
Aamma Aasianni inuk ataaseq Danmarkimit tikinnerminit malittarisassanik malinninnginnini pissutigalugu qaammat kingulleq 9.000 koruuninik akiligassinneqarpoq.
Taassuma misissorteqqinnermini tunillatsissimasutut oktoberip ulluisa 21-anni uppernarsarneqannginnerani inatsit pingasuni assigiinngitsuni unioqqutippaa.
