Siumumi qaleralinniarneq pillugu suli isumminngitsut
Nalunaarut, ilaatigut Uummannami, Upernavimmi Qeqertarsuullu Tunuani aalisarfiit pisassiiffiunngitsut pisassiivinngortinnissaannik aqutsiveqarfinnilu pilersitsinissanik imaqartoq Siumumit oqallisigineqanngilaq.
- Isumaqarpunga ajunngitsortaqarlutillu nalilersoqqissaagartaqartut ilumut allannguutit taamatut isikkoqassanersut. Aamma qularutiginngilara uani partiimi sapaatip akunnerata tulliani eqqartorimaarigut. Ilumut tusarniagassatut isikkussaa taama isikkoqarlutik piviusunngortinnissaa inuiaqatigiinnut naapertuutissanersoq, Karl Kristian Kruse taama oqarpoq.
AAMMA ATUARUK Aqutsiveqarfiit amerlanerit atulersinniarneqarput
Pisassiiviunngitsunik aalisarsinnaajunnaarsitsinissaq ilumut atorunnaarsinneqassanersoq taassuma pingaartumik apeqquserpaa. Pisassiiviunngitsuni aalisarsinnaaneq Karl Kristian Krusep 2014-imi atuutilersippaa.
Nalunaarusiaq Siumumit suli oqallisigineqanngitsoq
Naalakkersuisoq tusagassiortunut katersortitsimmat, parteeqatiminit taperserneqarnersoq, KNR aperaaq. Tassami Pisassiiffiunngitsut aqutsivinngortinneqarnissaat partiimi siornatigut assortuussutaavoq.
- Naalakkersuisooqatigiinni isumaqatigiissut naatsorsuutigivara tunuliaqutaasut tamarmik isumaqatigiinnerisigut anguniagassanngortinneqartut tamannalu tunngavigalugu uanga naalakkersuisutut pisussaaffiga naapertorlugu sulivunga.
Pisassiiffiungitsoqarunnaanissaanik, aqutsivinnillu pilersitsinissanik siunnersuutit akuerineqannginnermini, novembarip 22-ata tungaanut tusarniassutigineqassapput, naalakkersuisorlu allannguutaajumarunnartunik allannguilluni. Taamaaliorniarnerminili parteeqatiminit taperseneqassanersoq suli nalornarpoq.
AAMMA ATUARUK Pisassiiffiunngitsuni 78 millionit aalisarneqartut
Illua tungiliuttut utaqqeqqaassasut
Partiip siuttuata, Múte Bourup Egedep nalunaarutissaq suli nalersorsinaanngilaa. Partii aalisarnerup piujuaannartitsinermik tunngaveqarnissaanut suleqataassallutik piareersimavoq. Nalunaarulli Naalakkersuisut maanna tusarniaanerup kingorna qanoq ilusilerniarneraat utaqqeqqaarniarpaat, suliallu susassaqartunik politikkikkuttaaq siammasissumik peqataatitsilluarluni ingerlanneqarnissaa piumasaraat.
