Qaanaami spritip aalakoorniutitut atornerlunneqartarnera unitseqquneqartoq
![](/sites/default/files/styles/image_934x467/public/article_images/sprit_husholdningssprit.jpg?itok=6iapaqLe)
Qaanaami innuttaasut namminneq aalajangersinnaasuugunik spritit nioqqutaajunnaarseriarlugit imigassat kimittuut ammarteqqikkusukkaluarpaat.
AAMMA ATUARUK Aalakoornartutalimmik imigassartortarnerit tamarmik ajoqutaapput
Qaanaammi inuusuttut piumassutsiminnik pitsaaliuisuni suleqataasoq Frederikke Nielsen KNR-imut ima oqarpoq - Imigassat kimittuut sprit-imiit peqqinnarnerummata ammartikkusuppagut.
Inuusuttummi nunaqqatimik ilaasa sprit-imik aalakoorniuteqarlutik atornerluinerannut isiginnittuunerminnik qatsussilluinnarput: - Inuusuttuusugut takusagut nuannerpallaaratik inuinnaat aqqusernermi naapittakkagut tipittorujuit pisiniarfimmilu naapillugit nuanninngillat, Frederikke Nielsen oqarpoq.
AAMMA ATUARUK Qaanaarmiut sprittimik tuniniaaneq unitsikkusukkaat
Qaanaami inuusuttut imigassap kimittuup ammaqqinneqarnissaanut kaammattuuteqarnerat pivoq Qaanaami innuttaasut 50-it missaaniittut Qaanaami najukkami ataatsimiisitaliamit imigassaq aamma spritti pillugu oqallitsinneqarmata.
Qaanaami Najukkami ataatsimiititaliami siulittaasoq Mathæus U. Johansen, Qanoruumut ima oqarpoq:
- Silaannarmi oqallinneq annertooq pilermat innuttaasut tikillugit tusarniaaffigineqarnissaat anguniarsimavarput.
Piniartullu oqallinnermi peqataasut Qaanaami sprit-ip tunisaanera matuinnartariaqartoq aamma isumaqarput.
Piniartoq Qillaq Danielsen Qanoruumut ima oqarpoq: - Piniartut ilaat taamatut oqaluttut matuillugu ajunngilaq. Nunaqarfimmi pisariaqartitsisut pisisarumaarput. Maaniunngitsoq!
Piniartummi ullumikkut ungasissumut qimussissaarsimapput, aalisartunngornerminnilu kissartuliuutit gas-itortut kiassaatillu petruuliutortut atortalersimavaat.
- Taava spritti tassani atorpallaanngilarput, atorpallaarunnaarnikuuarput, Qillaq Danielsen oqarpoq.
Sprit-ilu Qaanaami innuttaasut ilaannit aalakoorniutitut atorneqaleraluttuinnarmat matuinnarneqarnissaa kissaatigineqartinneqarpoq.
- Imigassaq matuneqarsinnaassappat, soormi taava spritti matuneqarsinnaanngila? Taama ajornartorsiutaatigisoq, Qillaq Danielsen taama oqarpoq.
Qaanaami angajoqqaat imigassamik atornerluineranni meerarpassuit sumiginnarneqartarnerat 2007-imi juunimi saqqummiunneqarmat imigassamik 15 procentimit kimittunerusumik nioqquteqarneq matuneqarpoq.