MIO: Qaanaarmiut sprittimik tuniniaaneq unitsikkusukkaat
Naak siusinnerusumut sanilliullugu Qaanaami atornerluisuuneq takussaannginnerugaluartoq sprittimik atornerluineq annertoorujussuusoq nalunaarusiap takutippaa. Sprittimilli illoqarfimmi atornerluisuunermi kisimi ajornartorsiutaanngilaq.
- Meeqqat lim-inik, ikittaatit gassitassaannik naamaartartut aamma muskatnødit atornerlunneqariartornerat nalunaarutigineqarpoq, MIO angalanermi nalunaarummi allappoq.
Meeqqat Illersuisuat meeqqanik inersimasunillu illoqarfimmi inuuneq pillugu oqaloqatiginnikkiartorluni Qaanaamiippoq. Oqaloqatigiinnerni atornerluisuuneq ajornartorsiutaangaatsiartutut nassuiaatigineqarpoq. Tunisassiorfiup eqqaani illoqarfiup pisoqartaaniittumi naamaartoqartarmat, meeqqat tassani pinnguarnissaat navianartuusoq, innuttaasut nalunaarummi oqaluttuarput.
AAMMA ATUARUK Skolelærer glad for MIO's nye bog om opdragelse
Qaanaamili imigassamik atornerluisuuneq siusinnerusumut sanilliullugu takussaannginnerusutut aamma nassuiaatigineqarpoq.
- Imigassamik atornerluineq annikillinikuuvoq, 80’kunni imigassamik atornerluineq ersinnerujussuugaluarpoq, ullumikkut ersinngitsorujussuuvoq, innuttaasut MIO-mut oqaluttuarput.
Taamaakkaluartorli imigassamik atornerluisuuneq ajornartorsiutaangaatsiartoq MIO-p oqaloqatigisaata ilaasa oqaatigaat. Innuttaasuni eqimattat imigassanik tuniniaanermut akerliullutik, inersimasut atsiornerannik 169-inik katersisimallutik takutippaat. Meeqqat qassiiusut aamma atsioqataarusukkaluarput, 18-illi inorlugit ukioqarmata atsioqqusaasimanatik.
AAMMA ATUARUK MIO-p meeqqat pisinnaatitaaffii aallakaatitassiarissagai
Meeqqat atornerluisuunermik katsorsarneqartariaqartut pillugit misissuinermik ikiuinermillu aallartitsisoqartariaqartoq, MIO-p tikeraarnermini innersuussutigaa. Meeqqanut inersimasunullu katsorsaanissaq ajornaatsuusariaqartoq, MIO-p innersuussutigaa.
Aammattaaq atornerluisumut ilaqutaasut tamarmik ilaatinneqarneratigut imigassamik atornerluisuunermut katsorsartinneq iluatsilluarsinnaasoq, Meeqqat Illersuisuata innersuussutigaa.
Aaqqiineq: Innuttaasut imigassamik tuniniaasarnermut atsiornernik katersisimasut siusinnerusukkut allassimagaluarpoq. Tamanna kukkuneruvoq, matumanilu sprittimik tuniniaanerup innuttaasunit unitsinneqarusunnera pineqarluni.