Peqqissartut illuannut Københavnimut angalasut amerliartorput: - Ukiup annersaani inunnik ulikkaaqqasarpugut
Nerisarfimmi nerriviit aappaluttunik velourinik qaleqarput, igalaallu juullip ulloriaanik sungaartunik aappaluaartunik nivinngaavigineqarsimallutik. Gabriel Adreassen nerisarfimmi issiavoq, taanna Østerbromi Kalaallit Peqqissartut Illuannut decembarip aallartisimalaarnerani tikippoq.
Taassuma ilaquttani ukiuni 44-ni juullikkunni ilagiuaannarsimavai. Maannali Danmarkimi illoqarfiit pingaarnersaanniippoq kiannerusumi. Aputit takussaanngillat, aputit filminiittut eqqaassanngikkaanni.
- Soorunami ilaquttat eqqarsaatigeqqajaanaqaat, kisianni tassa allatut ajornaqaaq. Nakorsat ikiuiumaneri aallaavigalugu maaniissangama qujassutigaara ikiorumallunga taamaaliormata, attortisimalluni taanna oqarpoq.
Gabriel Andreassen Peqqissartut Illuanni nakorsiat 70-it ilagaat.
Ilai misissortittussaapput. Allat Københavnip napparsimaveqarfiini nakorsiassapput.
Tamarmilli piffissami ilaqutariit ataatsimoorfigisartagaanni ilaquttatik qimaqqavaat. Ilaquttanut maqaasineq decembarimi misigineqartartoq, Kalaallit Peqqissartut Illuanni aqutsisup, Birtha Biancop oqaatigaa.
- Inuppassuit angerlarsertartut paasisinnaalluarpakka, Ilaat sakkortuumik katsorsartittarput. Aammalu ilaquttatik nammineq angerlarsimaffitsik kulturertillu maqaasisarpaat piffissami erloqinartorsiorfiusumi tapersersorneqarusukkaluarlutik, Birtha Bianco oqarpoq.
Ilai kamallutik qisuariartartut
Københavnimi Peqqissartut Illuannukartut amerliartuinnarput. Peqqissartut affai kræftimik napparsimanertik pissutigalugu nakorsartittussaagamillu tamaaniittut, Birtha Bianco oqaluttuarpoq.
Birtha Biancop oqarnera naapertorlugu, Danmarkimi kræftimut nakorsaasinnaanerup eqaalligaluttuinnarnera Peqqissartut Illuannukartut amerligaluttuinnarneranut peqquteqarpoq.
Tamatuma kinguneraa Peqqissartut Illuata ulikkaapallattarnera, naak ilaqutaasoq ataaseq akeqanngitsumik ineqataasinnaagaluartoq inissaarussinnaasarpoq.
- Ukiup annersaani inunnik ulikkaaqqasarpugut, tamatuma saniatigut Kalaallit Nunaanni peqqinnissaqarfik Rigshospitalimi napparsimasunut akunnittarfimmik 15-inik inissaqartitsivoq, Birtha Bianco oqarpoq.
Ilaqutaasut ineqataanissaannik itigartitsisariaqarneq artornarnerpaat ilagigaat, aqutsisoq oqarpoq.
- Napparsimasut ilaat kamalertarput, allat aliasuttarput. Sakkortuumik qisuariartoqarsinnavoq tamannalu soorunami sulisunut sunniuteqartarpoq, taamaattumik pissutsit taamaannerat pillugu ilaatigut piffissarujussuaq atorlugu nassuiaattarpagut, taanna oqarpoq.
Ilaqutariiaarpassuit
Peqqissartut illuanni napparsimasut ilaquttaminnik decembarimi ilagisaqarsinnaanissaat sapinngisamik periarfissaatinniarneqartarpoq. Juullimmi nalaani amerlasuut isumakuluuteqartarput.
- Napparsimmavinni katsorsaanerit oqaloqatiginninnerit ulluinnarni initugaluartut, maliginnaasumik inuuniarsarivugut, decembarillu qaammataani assigiinngitsunik sammisassaqartitsisarpugut, Birtha Bianco oqarpoq.
Gabriel Andreassenip iggiaata misissorneqarnissaa pissutigalugu Københavnimukartinneqarpoq. Nuliamilu ilaanissaa kissaatigigaluarpaa, sulisariaqarmalli tamanna periarfissaanngitsoq, taanna oqaluttuarpoq.
Kalaallit Peqqissartut Illuani sulisut napparsimasullu allat kalaallit peqatigisarnerisigut ataatsimoorfeqarluartarnerik ikiuukkumatunerilu maluginiarsimallugit oqaatigaa.
- Nuanneqaaq, aamma inutsialassuugamik. Ilassiortut, soorluli ilaqutariaarpassuulluta maaniittugut. Taanna nuannequtigaa, imatut immikkoortitsisoqarani ataatsimoornerput nuannerpoq assorsuaq, aamma nukissamik tunisisarpoq.
- Taamak pineqarluni toqqissisimanarnerusutut misinnarpoq, taanna oqarpoq.
Inunnik ilisarisimasaqarnerulerneq
Inuit tallimat isersimaartarfimmi sofami issiapput. KNR-ip aallakaatitassiaa Unnu Manna Per Berthelsen pulaartuusoq isiginnaarpat.
Aron Grim ajaappiarpoq, taanna Nunatta avannaanit Kullorsuamiit Københavnimut siffissamigut suliaritikkiartorluni Kalaallit Peqqissartut Illuannut novembarip naalernerani tikippoq.
Taanna Gabriel Andreassenitut kisimiilluni tamaannarpoq.
- Qujanartumik nunaqqatitsinnik tamaanga pisoqarpoq, taavalu nunaqarfimmit allaminngaanniit ilisarisimasannik maaniittoqarluni, taanna oqarpoq.
Aron Grimmip suliaritinnissani ulluinnarni utaqqerujuuinnartarpaa.
Kalaalimerngit maqaasivai. Kalaallinilli najugaqateqarneq ajunnginnerarpaa.
- Ajunngilaq, ilisimasarisartaartorluni peqatingalugillu. Ajunngilaq, taanna oqarpoq.
