Aalakoornartutalimmik imigassartortarnerit tamarmik ajoqutaapput
Viinnimik baajamilluunniit ataasiinnannguartortarneq peqqiilliulernissamut siusissumilu toqunissamut aarlerinarnerulersitsisartoq, nunani 195-imi misissuinerujussuup nutaap tamanna takutippaa.
- Qanoq imigassartortigisinnaanermut aalajangersimasumik killissaqanngilaq, Seattlemi USA-miittumi peqqissutsimik uuttortaasarfimmi naliliisarfimmilu ilisimatooq, Max Griswold oqarpoq.
Griswoldip nunani 195-ini imigassartornermik misissuisut immikkut ilisimasallit 500-it siuttuuffigai.
Inuit 2,4 milliardit aalakoornartutalimmik imigassartortartut
Naak ilisimatuut misissugaasa takutittaraluaraat imigassartulaartarnerup uummatikkut nappaateqalersinnaaneq ilimanaatikinnerulersittaraa, imigassartornerit tamarmik navianartuusut, misissuinerup nutaap takutippaa.
- Aalakoornartup - alkoholip - illersuutissartarisinnaasaa tamatuma ulorianaataanit qulangerneqartoq, nalunaarusiap nutaap takutippaa, Griswold AFP-imut misissuinerup inernerinik, nakorsanut atuagassiami tutsuigisaasumi The Lancetimi tallimanngornermi saqqummiunneqartunik, naalisaalluni oqarpoq.
Nalunaarusiami allaatiginnittut ilaat, University of Washingtonimi professori, peqqissutsimillu uuttortaasarfimmi naliliisarfimmilu pisortaq, Emmanuela Gakidou, nammineerluni ilaatigooriarluni imigassartortarnerarpoq.
- Inuit 2,4 milliardit imigassartortartut assigalugit tamanna ilungersunartumik tigusariaqalerpara, Emmanuela Gakidou oqarpoq.
15-init 49-nut ukiullit akornanni toqqutigineqarnerpaajusoq
Imigassaq 2016-imi napparsimalernissamut siusissumilu toqunissamut aarlerinaatini arfineq-aappaavoq. Arnat toqusut akornanni 2 procentit missaanniittut angutillu toqusut akornanni 7 procentit missaanniittut imigassaq toqqutigaat.
Aap naqitsinerata qaffasinnera, pujortartarneq, inunngornermi oqippallaarneq, igunngujaarneq, sukkorneq, oqimaappallaarneq mingutsitsinerlu 2016-imi toqqutigineqarnerpaapput. Imigassartortarnerli 15-init 49-nut ukiullit akornanni toqqutigineqarnerpaavoq.
Nalunaarusiap takutippaa Danmark nunarsuarmi imigassartorfiunerpaasoq, angutit tamarmik 97 procentii 2016-imi imigassartortarlutik. Norge tulliuvoq angutit 94 procentii imigassartortarlutik.
Arnat akornanni atornerluineq qiviaraanni, Danmarkimi qaffasinnerpaavoq, 95 procentii atornerluimmata, Norgelu tulliulluni kisitsit 91 procentimiilluni.
