Great Greenland: Puisit amii mikisukkuutaarlugit atisaliornermi atorneqassapput
Great Greenland mutinik atisaliortartunut tunisassani namminerlu ukiup qanoq ilineranut naleqquttuliaani puisit amiinik atuinerussaaq, kisianni amiminikkaajunerusunik.
Ingerlatseqatigiiffik taama pilersaaruteqartoq, pisortaaneq Ditte Sorknæs oqarpoq.
- Pisisugut nutaanut malinnaapallattartuupput nutaalianillu piserusuttarlutik. Amernik kusanartulianik pisinermiit oqorsaatinik piserusunnerusarput, Ditte Sorknæs oqarpoq.
Great Greenlandip Københavnimi atisanik ukiumoortumik saqqummersitsinersuarmi atisat arfineq-marluinnaat saqqummiuppai - tamarmik kavaajat, amimineq kavaajap ilaminiinnaralugu.
AAMMA ATUARUK Great Greenland Koreami tunisaqarluartoq
Soorlu assersuutigalugu kavaajap aatigut allaliinnagaq, ilusilersuisoq Jesper Høvring oqarpoq.
- Puisip amiinnaa atorlugu kavaajaliunngilagut. Eqqarsaatigilluareerlugu tamanna aalajangigaraara. Annoraamerngit assigiinngitsut atorlugit ilusilersorusussimavakka. Savaaqqap amia meqqulik, savap meqqui teriannissallu amia akuleriississallugit nuannaraara. Tamakku tamarmik Kalaallit Nunaanneersuupput. Puisilli amiinnaa atorlugu ukiormanna ilusilersuinngilanga, Jesper Høvring oqarpoq.
AAMMA ATUARUK Great Greenlandip ammerivia matugallassaaq
Ditte Sorknæs naapertorlugu puisit amiinik ilusilersukkat ikittuinnaat imminut tuninissat eqqarsaatavoq, aammali ilusilersuisartunut allanut isumassarsiortitsissallutik.
Great Greenlandillu taamaasiornikkut puisit amii akisuninngorlugit tunisaqarnerulissaaq.
Great Greenland 24 millionit koruuninik 2015-imi amigartooruteqarpoq.
Ingerlatseqatigiiffik 2016-imi amigartooruteqaranilu sinneqartooruteqannginnissaa, Ditte Sorknæsip Great Greenlandimi siorna pisortaaninngortup naatsorsuutigaa.
