Great Greenlandip puisit amiinik ikittukkaarlugit tunisisarneq killilersimaarusuppaa
Puisit amii ikittukkuutaarlugit tunineqartartut killilersimaarniarlugit maleruagassat atuutilersinneqarput, taama nassuiaateqarpoq Great Greenlandimi pisortatut tunualersoq.
- Januarip aallaqqaataani atuutilersumik KNAPK, Namminersorlutik Oqartussallu kiffartuussinissamik isumaqatigiissuteqartoqarnerani piumasaqaatinik pingasunik imaqarpoq, Great Greenlandimi pisortatut tunuartussaq Lars Berg taama oqarpoq.
Piumasaqaatit nutaat atuutilersinneqarput puisit amii tunineqartartut killilersimaarniarlugit taakkualu piniartup aningaasarsiorniarneranut annikitsuinnarmik sunniuteqassallutik, Lars Berg oqarpoq.
Aamma atuaruk Pilersaarut nutaaq: Ammit tunisat iginneqartassapput
Puisit amii ikittukkuutaarlugit tunineqartartut killilersimaarniarneqarput, tamannalu annertunerusumik sunniuteqartussaanngilaq, Lars Berg nassuiaavoq.
Maleruagassat nutaat KNAPK-mit iluarineqanngillat. Siulittaasoq isumaqarpoq, maleruagassat allanngortinneqarneri Naalakkersuisut Great Greenlandilu mianersornerusariaqaraluartut.
- Nunaqarfiit eqqarsaatigigutsigit, puisit neqaat nerisarineqarput, amiilu atisarineqarlutik taamaattumik killiliineq aamma taakkua aningaasatigut tapertaajunnaarnerat isumaqarpunga mianersuunneqartariaqartoq, eqquinerlorujussuassaaq piffiit ilaannut, KNAPK-imi siulittaasoq Henrik Sandgreen taama oqarpoq.
Aamma atuaruk Puisit amiinik kavaajaliat oqaluttuaannanngussapput
Maleruagassat nutaat atuutilersinneqarnerisigut, piniartoq puisit amiinik tunisinermut tapiissutinik akuersissummik pisinnaavoq piumasarineqartut arlaqartut ataaserluunniit anguneqarsimappata.
Assersuutigalugu Piniartoq ukiuni kingullerni pingasuni puisit amiinik tunisaqarnermini 4.000 koruunit nalinginik tunisaqarsimanissaa Great Greenlandip ammerivianut 2016-imi tunisisinnaanissaanut piumasaqaataavoq,
Puisit amiinik tunisinermut tapiissutinik pisoqarsinnaavoq puisinik piniarneq 2016-imi aallartinneqarpat ikinnerpaamillu 4.000 koruunit nalinginut puisit amiinik tunisaqarsimanissaq
Aamma atuaruk Great Greenlandip pisortaa taamaatilerpoq
Henrik Sandgreen isumaqarpoq, pineqartoq pillugu KNAPK naammattumik tusarniarneqarsimanngitsoq.
- Maleruagassat allanngortinneqarneri pillugit malinnaatinneqannginnerput minnerunngitsumillu ilisimatinneqannginnerput uggornartuuvoq, Henrik Sandgreen oqarpoq, allanngortinneqarnissaat sioqqullugit piareersarsimasinnaagaluarput paasisitsiniaallutalu, KNAPK-imi siulittaasoq Henrik Sandgreen oqarpoq.
