Great Greenland Koreami tunisaqarluartoq
- Nioqqutissat qalipaatigissaartut, piuminartut arnarpaluttullu, soorlu matuersaataasiviit taskillu Kangiani niuerfimmi tuniuminartuupput, Great Greenlandip pisortaanera Ditte Sorknæs taama oqarpoq nangillunilu:
- Iluatsitsinissarput neriuutigaarput, suleqatigisattali sapaatit-akunneri marluinnaat qaangiuttut tunisassiatsinnik nunguutsinissaa takorloorsimanngilarput, pisortaaneq Ditte Sorknæs taama oqarpoq, tunisassianillu suli amerlanerusunik Koreamut nassiussisoqarsimanera nuannaarutigalugu.
Koreami atisanik takutitsineq. Asseq: Great Greenland
Great Greenlandip Hyundaimi pisiniarfia sapaatit-akunnerata siuliani danskit ministeriunerannit Lars Løkke Rasmussenimit nulianillu alakkarterneqarpoq. Taakku inuussutissarsiornikkut nittarsaassinermut atatillugu Koreamiipput. Pilersaaruterpassuaqaraluarlutik Seoulimi Pangyomi pisiniarfiup alakkarnissaa piffissaqarfigisimavaat.
- Danmarkimit Koreamut pisortatigoortumik tikeraartoqarneranut atatillugu tunisassiatta sammineqarnerat nuannaarutigalugulu tulluusimaarutigaarput. Great Greenland nittarsaassinermut atatillugu angalaqataanngilaq, taamaakkaluartorli pisiniarfiutitta alakkarterneqarpoq. Tamannalu uatsinnut isumaqartupilussuuvoq, Ditte Sorknæs taama oqarpoq.
Great Greenlandip suleqatigisaa Kopenhagen Fur nerersuaaqatigiittoqarnerani amminik atisalianik takutitsivoq. Puisit amiinik atisaliat nereqatigittunut nuimasunut 300-nut takutinneqarput.
Nunatta Koreami siorna marsip qaammataani inuussutissarsiornikkut nittarsaassineranut Great Greenland peqataavoq, suliffeqarfillu Kinami ulluni makkunani nittarsaassisoqarneranut aamma peqataalluni.