Politikkimut malinnaasoq: Naalakkersuisuni sakkortuumik toqqissiviilliortoqarpoq
Naalakkersuisuni sakkortuumik toqqissiviilliortoqarpoq.
Taama naalakkersuinikkut politikkimik ingerlatsinermik, Nammisornerullutik aamma Namminersorlutik Oqartussani pisortaanertut, ukiorpassuarni qanimut malinnaasimasoq, Kaj Kleist, isumaqarpoq.
Toqqissiviilliorneq, Naalakkersuisut qulinik inuttaqartut ilaataa ataatsip, nunanut allanut, inuussutissarsiornermut, niuernermut silallu pissusianut naalakkersuisup, Pele Brobergip (N), qallunaat aviisiannut Berlingskemut apersorneqarluni aallartippaa.
Pele Broberg Berlingskemut oqarpoq nammineq isumaqarluni nunanit allaneersut nunatsinni najugallit, nunatsinni innuttaasunut namminersulivinnissaq pillugu siunissami taasititsinerni qinersisinnaatitaasariaqanngitsut.
AAMMA ATUARUK Atassut: Múte Naalakkersuisuni maanna nikititerissaaq
Aamma oqarpoq nammineq oqaaseq "naalagaaffeqatigiinneq" atoqqinniarnagu. Taarsiullugu taaguut "Danmarkip naalagaaffia" atortalerniarlugu.
Tamannalu kinguneqarpoq. Naalakkersuisummi siulittaasuat, Múte B. Egede (IA), ippassaq unnukkut naqqiuteqarpoq, taamaaliornermigullu naalakkersuisuminut siullerpaamik akerliliivoq. Múte B. Egedemmi
Pele Broberg nunanit allaneersut nunatsinni najugallit, nunatsinni innuttaasunut namminersulivinnissaq pillugu siunissami taasititsinerni qinersisinnaatitaasariaqannginnerarlugit isummermat isumaqatiginngilaa.
Qajannartumiipput
Pele Brobergillu taama oqaaseqarneratigut Naalakkersuisut qaammatit tallimangajaat matuma Naalakkersuisutut nutaatut inuiaqatigiinnut ilisaritikkamik kissaatigisimasaraluamittut inissisimanatik, maanna qajannartumik naatsorsuutigineqarsinnaanngitsumillu inissisimaffeqalerput.
Taama Kaj Kleist isumaqarpoq.
- Tassa massakkut nalorninartorujussuupput, pingaartumik Naalakkersuisooqatigiit, Naleqqakkut IA-lu, qanoq sivisutigisumik suleqatigiilluarsinnaanerat uanga nalornigikujuppara oqaaseqarfigissallugu, Kaj Kleist oqarpoq.
Inuit Ataqatigiit politikkikkut siulittaasuata tullia, Aqqaluaq B. Egede, Sermitsiaq.AG-mut sapaammi oqarpoq Naalakkersuisuni nikittoqarnissaa ilimanarsinnaasoq.
- Tassa periarfissat tassaniilersimapput maannakkut, Kaj Kleist oqarpoq.
- Taanna eqqarsaatigeqqittariaqartussaassaaq, taanna oqarpoq.
AAMMA ATUARUK Atassut: Pele Brobergimut tatiginnikkunnaarpugut
Naleqqammi siulittaasua, Hans Enoksen, Facebookikkut ullaaq saqqummiussaqarpoq. Taassuma sakkortuuliorluni takisuumik allaaserisaqarluni Pele Broberg illersorpaa.
- Taamaattumik isumaqatigiinnginnerit annertusisutut isikkoqarput. Taamaalilluni nalorninarluni qanorpiaq inerneqarsinnaanera. Imaluunniit Naalakkersuisut nikisinnerinik naammassanersoq, Kaj Kleist oqarpoq.
- Kisianni Naalakkersuisunik nikisitsineq soorunami tamanit isumaqatigineqartussaassaaq. Tassa suleqatigiit marluullutik. Imaappoq Inuit Ataqatigiinnit Naleqqaminngaanniillu, taanna oqarpoq.
Siumut periarfissaavoq
Inuit Ataqatigiit Nalerarlu qajannartumik amerlanerussuteqarput, tassalu Inatsisartuni ilaasortaq ataaseq.
Naalakkersuisooqatigiillu taakkua suleqatigiinerit qaammatini tallimangajanni atuutereerluni ajalusuussappat, Inuit Ataqatigiit ikinnerussuteqarlutik Naalakkersuisuutitaqarnissaat ilimananngilaq, Kaj Kleist taama naliliivoq.
- Taanna ajornakusoorunarpoq, oqarpoq.
Naalakkersuisooqatigiit nikisinniarnerat iluatsinngippat, taava susoqarsinnaava?
- Periarfissat ikittuararsuupput, oqarpoq.
AAMMA ATUARUK Aaja Chemnitz Larsen: Pele Brobergip oqaasimigut Kalaallit Nunaat innarlerpaa
Inatsisartunimmi partiit tallimaannaapput. Taakkunannga pingasut Naalakkersuisunut attuumassuteqarput. Marluk naalakkersuisooqatigiittut, pingajuat tapersersortaavoq. Sinnerupput Demokraatit aamma Siumut illuatungiliuttuusut.
- Illuatungiliuttuni Inuit Ataqatigiinnut qaninneq tassaavoq Siumut. Taakkualu kisimi suleqatigiilersinnaanerat kisimi periarfissaasinnaasutut isigineqarsinnaavoq. Kisianni tamakkua nalorninartorujussuupput imaalitsiaannaq oqaaseqarfigissallugit. Kisianni periarfissaq tassaniippoq, Kaj Kleist oqarpoq.
Inuit Ataqatigiit Siumullu naalakkersuisooqatigiissinnaanerat iluatsinngippat, Naalakkersuisut siulittaasuat qanoq ingerlariaqqissanerluni naggataani aalajangiisussaavoq.
- Ikinnerussuteqarluni ingerlariaqqissanerluni imaluunniit allatut qinersinermik kingunilimmik iliuuseqartariaqassanerluni, Kaj Kleist oqarpoq.
Kaj Kleistimmi oqarnera naapertorlugu Inuit Ataqatigiit aamma Demokraatit imminnut Naalakkersuisooqatigiinnissaminnut ungasippallaarput.
- Aamma eqqaamasariaqarpoq qinersereernerup kinguninnguatigulli Demokraatit arlaleriaqalutik Inuit Ataqatigiit, Naalakkersuisullumi, assuaralugit oqaaseqaqattaarnikuupput. Aamma taanna ingerlatiinnarniarlugu soorlu isummersimagunartut, oqarpoq.
Kuannersuit ukkatarineqartut
Naalakkersuisut maanna killiffiat qanoq nalilersinnaaviuk?
- Uani oqartariaqarpunga immaqa annertunerusumik Inuit Ataqatigiit ajugaaneranni tunngavineqarsimasut tassaasimasut Kuannersuit pillugit naaggaarneq. Taanna annertuumik suliaqarfigisimavaat, Kaj Kleist oqarpoq.
- Taavalu suliassatik assigiinngitsut allat ersarissarsimanngilaat. Tamanna aningaasanut inatsisissamut siunnersuutaanni takuneqarsinnaavoq. Taanna pissanganarnerpaassaaq ilumut ingerlaannartumik akuerineqarumaarnersoq. Imaluunniit allanngortitingaatsiarneqarumaarnersoq, oqarpoq naggasiillunilu:
- Tamakkuupput taama sivikitsigisumik Naalakkersuisooreerlutik misilittagaat annikippallaartut, taamaalillutik nalorninermik kinguneqartitsisinnaasartut. Ajoraluarlutumik.