Atassut: Pele Brobergimut tatiginnikkunnaarpugut
Nunatsinni namminiilivinnissamut tunngatillugu inuit nunatsinneersuunngitsut soorlu europameersut, kangianeersut nunanilluunniit allanit tunuliaqutillit nunatta namminiilivinnissaanut tunngasunik taasisinnaatitaasariaqanngitsut, nunanut allanut naalakkersuisoq Danmarkimi tusagassiorfimmit Berlingskimit apersorneqarneqarluni oqarnerata kingorna taama qisuariartoqarpoq.
AAMMA ATUARUK Múte B. Egede Pele Brobergip oqaasiinut naqqiuteqartoq
“Inuup kinaassusaanik sumiuussusaanillu immikkoortitsiniarneq akuerineqanngisaannarli. Naalakkersuisut Siulittaasuat piaartumik kinguneqartitsisariaqarpoq.
Inuit tamatta naleqassuseqarpugut qanorluunniit isikkoqarutta, sumiluunniit inunngorsimagutta. Inunnik isiginnittariaatsip qangarsuarli atorunnaarsimagaluartup ullutsinni immikkoortitsiniarnikkut oqariartuutigineqarnera assorsuaq tupaallannarpoq. Pingaartumillu Naalakkersuisuminngaaneerneri akuerineqarsinnaanani.”
Naalakkersuisut siulittaasuat Múte B. Egede Aatassummit qisuariaqquneqarpoq.
Nunatsinni immikkoortitsisoqassanngilaq
Naalakkersuisut inuit taasisinnaatitaaneranut immikkoortitsisoqarnissaanik naalakkersuisut politikkeqanngitsut sapaammi ualikkut Múte B. Egede nalunaaruteqarpoq.
- Nunatsinni innuttaasut tamarmik naligiimmik assigiimmillu pisinnaatitaaffeqarput, taakkulu Naalakkersuisut qaqugumulluunniit illersortuassavaat. Tamallu oqartussaaqataanerat qaqugumulluunniit illersorneqartuartariaqarpoq, naqqiummi ilaatigut atuarneqarsinnaavoq.