Múte B. Egede Pele Brobergip oqaasiinut naqqiuteqartoq

Nunatsinni innuttaasut inuiaassuseq aallaavigalugu assigiinngitsumik pineqarnissaat naalakkersuisut politikkerinngilaat.

Múte B. Egede naalakkersuisut sinnerlugit taama naqqiuteqarpoq.

- Nunatsinni innuttaasut tamarmik naligiimmik assigiimmillu pisinnaatitaaffeqarput, taakkulu Naalakkersuisut qaqugumulluunniit illersortuassavaat. Tamallu oqartussaaqataanerat qaqugumulluunniit illersorneqartuartariaqarpoq, naqqiummi ilaatigut atuarneqarsinnaavoq.

Assigiinngisitaarneq peqqinnartuusoq

Nunanut allanut, inuussutissarsiornermut, niuernermut silallu pissusianut naalakkersuisup Pele Brobergip Danmarkimi aviisit ilaannut Berlingskemut oqaaseqareernerata kingorna naqqiuteqartoqarpoq.

Nunatsinni najugallit, naggueqatigiit Inunnit kingoqqisuunngitsut assersuutigalugu nunatta namminiilivinnissaanut innuttaasut taasitinneqarneranni peqataasinnginnissaat taassuma ilaatigut oqaatigaa.

AAMMA ATUARUK Pele Brobergip kikkut nunatsinni qinersisinnaatitaassanersut oqallisigineqartariaqarsoraa

Pele Brobergip oqaasii naalakkersuisut isumarinngikkaat Múte B. Egedep erseqqissaatigaa:

- Suliat qulaani taaneqartut pissutigalugit Nunanut Allanut, Inuussutissarsiornermut, Niuernermut Silallu Pissusianut Naalakkersuisup tusagassiorfimmit issuarneqarnera Naalakkersuisut isumarinngilaat,naalakkersuisut siulittaasuat oqarpoq.

Naalakkersuisut Namminersorneq pillugu inatsit tunngavigalugu sulisut taassuma naqqiummi ilanngullugu erseqqissaatigaa:

- Naalakkersuisut Namminersorneq Pillugu Inatsit aallaavigalugu sulimmata, nunattalu namminiileriartorneruneranut sulinermi suleqatissagut, Namminersorneq Pillugu Inatsit tunngavigalugu tassaammata danskit naalakkersuisui, tamannalu naalakkersuisut siulittaasuata susassaqarfigaa, naalakkersuisut siulittaasuata Múte B. Egedep oqaatigaa.