Atassut: Múte Naalakkersuisuni maanna nikititerissaaq

Atassut kamassimavoq. Siulittaasup, Aqqalu Jerimiassenip Broberg naalakkersuisoqarfimmit erngertumik peersikkusuppaa.
Aqqalu Jerimiassenip Naleqqap siulittaasua Hans Enoksen Inuit Ataqatigiillu siulittaasuat Múte B. Egede ippassaq ataatsimeeqatigai. Aqqalu Jerimiassenillu Múte B. Egede nikititerinissaanik tassani kaammattuuteqarfigaa. Assi © : KNR / Malik Brøns
septembarip 20-at 2021 11:27
Nutserisoq Connie Fontain

Pele Broberg nunanut allanut naalakkersuisuujunnaassaaq.

Partii Atassut Pele Brobergip ippassaq oqallitsitseqqilernerata kingorna taama isumaqarpoq.

Pele Borberg Berlingskemit apersorneqarnermini oqaaseq “naalagaaffeqatigiinneq” atorunnaarniarlugu oqaatigaa, taassumami oqarnera naapertorlugu oqaaseq danskit Kalaallit Nunaannut naalagaaffiginninnerannut patsisaavoq.

Naleqqamiilli politikerip oqarnera Berlingskep kisiat allaaserinngilaa.

Naalakkersuisoqatigiit

Inatsiartuni qinigaaffiit 31-upput. 

Inuit Ataqatigiit aqqaneq-marlunnik qinigaatitaqarput. 

Naleraq sisamanik qinigaatitaqarpoq. 

Partiit marluk taamaalillutik ataatsimik amerlanerussuteqarput. 

Partii ikorfartortaasoq Atassut Inatsisartunut marluinnarnik qinigaatitaqarpoq.

Pele Brobergimmi nunatsinni innuttaasut siunissami taasitinneqassagaangamik kikkut assersuutigalugu nunatta namminiilivinnissaanut taasititsinermi taaseqataasinnaassanersut oqallisigineqartariaqarsoraa.

Broberg naleqqutinngitsoq

Atassutillu tamanna maanna kamaatigaa. Atassutip siulittaasuata, Aqqalu Jerimiasseniip Pele Broberg naalakkersuisoqarfimmiikkunnaarsikkusuppaa, Naalakkersuisullu siulittaasuat, Múte B. Egede erngertumik nikisiterisariaqartoq Aqqalu Jerimiassen isumaqarpoq.

- Ilorrisimaanngitsorujussuuvugut, Pele Broberg tunuliaqutakkalu tapersersorsinnaanngilarput. Nunanut allanut tunngasunut naalakkersuisoqarfimmik isumaginninnissamut piukkunnanngilaq, Atassutip siulittaasua oqarpoq.

Atassut naalagaaffeqatigiinnut nammineq tapersersuisuuvoq.

AAMMA ATUARUK Atassut: Ikke tillid til Pele Broberg

- Nunatsinni qallunaatut oqaluttunik kalaalerpassuaqarpoq. Taakkualu innuttaasutut nalikinnerunngillat. Ingammik naalakkersuisuugaanni inuiaqatigiit avissaartuutsinnaveersaartariaqarput. Taamaaliorneq uloriarnarnerpaassaaq, Aqqalu Jerimiassen oqarpoq.

Taassuma Naleqqap siulittaasua Hans Enoksen Inuit Ataqatigiillu siulittaasuat Múte B. Egede ippassaq ataatsimeeqatigai. Aqqalu Jerimiassenillu Múte B. Egede nikititerinissaanik tassani kaammattuuteqarfigaa.

- Taassuma Naalakkersuisut siulittaasuatut akisussaaffigaa. Maannakkut iliuuseqarnissaa pitsaanerpaassaaq, Atassutip siulittaasua oqarpoq.

Naalakkersuisumut tatiginninngitsut

Pele Brobergimut tatiginnikkunnaarlutik Atassutip ippassaq nalunaarutigaa.

Atassut Inatsisartuni pingasunik qinigaaffeqarpoq, naalakkersuisoqatigiinnullu ikorfartortaalluni.

Naalakkersuisoqatigiit ilisimaneqartutut tassaapput Naleraq IA-lu taakkulu katillutik Inatsisartunut 16-inik qinigaatitaqarput: IA aqqaneq-marluk Nalerarlu sisamat.

Inatsisartuni ilaasortat 31-upput, taamaammat naalakkersuisoqatigiit ataatsimik amerlanerussuteqarput.

Naleraq naalakkersuisoqatigiinniikkunnaassagaluaruni IA Inatsisartuni amerlanerussuteqarunnaassaaq – Atassullu ikorfartuisuinnaarusulluni.

AAMMA ATUARUK Aaja Chemnitz Larsen: Pele Brobergip oqaasimigut Kalaallit Nunaat innarlerpaa

Múte B. Egede nammineerlunilu nikititeraluni Pele Broberg naalakkersuisoqarfimmiit peersinnianngippagu Brobergimut tatiginninnginnermik ukiakkut ataatsimiinnermi taasisoqassaaq. Atassulli taamaaliorusunngikkaluarpoq.

- Naalakkersuisut uppisikkusuppallaanngilagut, Aqqalu Jerimiassen oqarpoq.

Naleraq naalakkersuisoqatigiinniikkunnaaassagaluarpat iserusunngilasi?

- Naamik ilimaginngilara. Tamanna isumaliutiginikuunngilarput, Atassutip siulittaasua oqarpoq.

- Naamik, naalagaaffeqatigiinnut namminiilivinnissamullu isumarput assigiinngippallaarpoq, Aqqalu Jerimiassen oqarpoq.

Muté B. Egedemit sukannersumik inissinneqartoq

Pele Brobergip Berlingskemit apersorneqarnera ippassaq saqqummersinneqareermat Múte B. Egede naalakkersuisuminut siullermeerluni akerliliivoq.

Tamanna allakkatigut sukannersumik oqaaseqarneratigut pivoq:

- Nunatsinni innuttaasut inuiaassuseq aallaavigalugu assigiinngitsumik pineqarnissaat naalakkersuisut politikkerinngilaat.

AAMMA ATUARUK Múte B. Egede Pele Brobergip oqaasiinut naqqiuteqartoq

- Nunatsinni innuttaasut tamarmik naligiimmik assigiimmillu pisinnaatitaaffeqarput, taakkulu Naalakkersuisut qaqugumulluunniit illersortuassavaat. Tamallu oqartussaaqataanerat qaqugumulluunniit illersorneqartuartariaqarpoq, naqqiummi ilaatigut atuarneqarsinnaavoq.

Inuit Ataqatigiinniit, Naleqqamiilluunniit ullaap tungaani oqaaseqartitsiniarnerput iluatsinngilaq.