Aaja Chemnitz Larsen: Pele Brobergip oqaasimigut Kalaallit Nunaat innarlerpaa

Qinersoqartillugu qinersisinnaasut suminngaanneersunit kingornineri naapertorlugit taaseqataasinnaatitaanissaannik Pele Broberg oqalulluni, nunat tamat akorngini Kalaallit Nunaat kisiartatut inissippaa Nunattalu tusaamaneqarneranik innarliilluni. Puffassaarinerit pinnagit Kalaallit Nunaannut iluaqutaasunik iliuuseqarnissaq, Inuit Ataqatigiit piumasaraat.
Europameersut, amerikameersut Kangianeersullu nunatsinni najugallit nunatsinni innuttaasunut taasititsinerni peqataasinnaannginnissaannut nunanut allanut naalakkersuisup oqaasii Aaja Chemnitz Larsenip illuatungilerpai. Assi © : Malik Brøns
Allattoq Mathies Hvid Toft, Malik Brøns
septembarip 19-at 2021 16:26

Inuit Ataqatigiit naalakkersuisooqataasoq Pele Broberg, Naleraq, isumaqatiginngilaat.

Siulittaasup tulliatut qinigassanngortittoq Inuit Ataqatigiillu sinnerlugit folketingimi ilaasortaq, Aaja Chemnitz Larsen, isumqarpoq, inuit taamatut immikkoortiternissaannik Pele Brobergip eqqarsaatai, Nunatsinnik innarliisinnaasut.

Naggueqatigiit inuit kinguaavi kisiisa qinersisinnaatinniarpai, namminersulivinnissaq pillugu qinersisoqassappat taakkua kisiisa taasisinnaatikkusullugit.

- Taamatut oqalukkutta, ikinngutivut suleqatigullu, Danmarkiinnaanngitsoq, aammali USA nunallu allat ungasilliartuaassavagut, itisiliillunilu.

- Taakkuami eqqarsassammata, Nunatsinni susoqarnersoq? Tamanna innarliutaasinnaasoq isumaqarpunga, Kalaallit Nunaatalu tatiginarnini annaasinnaagaa isumaqarlunga, taanna Nuummi partiip ataatsimeersuarnerata nalaani KNR-imut oqarpoq.

Pele Broberg-ip oqaasii aamma Danmarkimi sakkortuumik qisuariarfigineqarput. Danmarkimi naalakkersuisut tapersersortaani, SF-imi Nunat allat kiisalu Kalaallit Nunaat pillugit oqaaseqartartuata, Karsten Høng-ip Berlingske-mi Pele Broberg Danmarkimi Dansk Folkepartiimi ingasaassiniatut isummersornerarpaa.

Danmarkimi pissutsinut sanilliullugu, Pele Broberg soorlu Nye Borgerlige imaluunniit Dansk Folkeparti ingasaassiniaasut, Karsten Hønge, SF sinnerlugu nunat allat kiisalu Kalaallit Nunaat pillugu oqaaseqartartoq.

Demokratiimut akerliuvoq

Pele Broberg-ip siunnersuutaa isumaqatiginngilluinnarlugu, Aaja Chemnitz Larsen-ip erseqqissarpaa.

- Inuit Ataqatigiit uangalu nammineq demokratii sorsuutigaarput, demokratiimillu naapertuinermi inuiaqatigiinni innuttaaqataasut ataqqineqartarput. Tassunga taarsiullugu demokratiimik naapertuisut amerlanerulernissaasa qulakkeernissaasa sulissutiginissaat ujartorpara, tamatumuun apriilimi Inatsisartunut qinersinermi Folketingimullu qinersinermi qinersisukinnera eqqaallugit.

Danmarkimi aviisimi Berlingske-mi apersortilluni Pele Broberg oqarpoq, innuttaasut suminnganniit kingoqqisuuneri naapertorlugit immikkoortiterinissaq eqqarsaatigalugu, oqaaserlu ”naalagaaffeqatigiinneq” nammineq atorunnaarumallugu.

Naalakkersuisoq sulilertariaqarpoq

Taamatut pisoqarneratigut Kalaallit Nunaata Danmarkillu akornanni pissutsit naligiissarnissaannik oqallinneq allamut saasarneqartoq, Aaja Chemnitz Larsen isumaqarpoq.

- Periuserisinnaasat nipagiullugit sulisoqartariaqarpoq. Politikeritut isigineqarnitsinnut tamanna iluaqutaaqqajaqaaq.

Isummat naapertorlugu Pele Broberg-ip suut suliarisariaqarpai ?

- Inuussutissarsiorneq pillugu suliniutinik suli takusaqarnikuunngilanga, siumaqarpungalu nunanut allanut politikki inuussutissarsiornermullu politikki imminnut ataqatigiilluinnartut. Maannakkorpiaq nunanit tamanit aatsaat taama maluniarneqartigilerpugut, tamannali suli avataaniit aningaasaliisoqartarneratigut tamanna atorluarnikuungilarput, taanna oqarpoq.

Pele Broberg-ip siunersuutaa ”qangarsunnitsumik eqqarsartarnertut” taassuma isigaa, Nunarsuarmi tamat niueqatigiinnerannut, kulturiniit tamaniit kingoqqisut innuttaaffigisinnaasaanni Kalaallit Nunaanni inuusugut erseqqissarlugu.

Aamma atuaruk