Politikkikkut aaqqissuisoq: Aleqa Hammond Siumumit pisariaqartinneqarunarpoq
Aleqa Hammondip piginnaasai suunersut Siumup nalunngikkai, Jensigne Berthelsen oqarpoq.
- Silappaarissorujussuuvoq akunnattoorfeqanngilaq oqallorissorujussuuvoq kisianni politikkimut sangutissagaanni namminiilivinnissamut tunngatillugu malunnartorujussuarnik sukataaruteqallaqqittorujussuuvoq.
Aleqa Hammond pillugu:
- Aleqa Hammond Grønlandsbankenimi kontumini aningaasaateqarani akiliummik katillugit 5.100 koruuninik 90-ikkunni atuisimavoq. Taassuma akiliissutini matoqqasoq qaammatini marlunni atorlugu akiliissutigisarsimavaa. Tassa kortini matuneqareersoq Hotel Godthåbimi sippuilluni atorsinnaasimavaa.
Aleqa Hammondip pisut politiinut nassuerutigai 1996-imilu unnerluutigineqarluni. Suliarli Berlingsip saqqummiineranitigut tamanit 2013-imi aatsaat ilisimaneqalerpoq.
- 2008-imi Aleqa Hammond Aningaasaqarnermut nunanullu allanut tunngasunut Naalakkersuisuunermi nalaani, aalakoorluni akiligassaq akilernagu taxaniit qimaasimammat, Nuummi Politiinut unnerluunneqarpoq. Suliarli kingorna annerulersinneqarani matuneqarpoq.
- 2013-imi Aleqa Hammond Naalakkersuisut siulittaasunngutsiareerluni pisortat aningaasaataanik atortarsimasoq kukkunersiuinermut ataatsimiititaliap paasivaa. Aleqa Hammond 204.000 koruuninik Namminersorlutik Oqartussat aningaasaataanik atuisimavoq. Kukkunersiuisullu arlaleriarlutik akileeqqusisareersut, Aleqa Hammondip 2014-imi aningaasat Nunatta karsianut utertippai.
Nunatta karsianit tigusisimanerup kingorna Aleqa Hammond ukiup aappaa avillugu Naalakkersuisunut siulittaasooreerluni tunuarpoq, kinguninngualu nutaamik inatsisartunut qinersisoqarluni.
- Aleqa Hammondip Folketingimi ilaasortaanerminut atatillugu kreditkorterisani atorlugu 13.000 koruunit nalinginut imminut pisiortorsimasivoq, e-mailimi Ekstra Bladep saqqummiussaani tamanna atuarneqarsinnaavoq.
Hammondip allaffissornermi paatsooqatigiittoqarsimaneranik aallaqqaammut nassuiaatigigaluarpaa. Nassuiaateqarninili kingorna utertillugu. Suliaq taanna Siumumit ilaasortaajunnaarneranik kinguneqarpoq.
Aleqa Hammondili inuiaqatigiinnut siusinnerusukkut aalassatsitsingaatsiartarnikuuvoq. Taanna 2013-imi qinersisoqarmat taaguunneqangaatsiarluni Naalakkersuisunut siulittaasunngorpoq.
AAMMA ATUARUK Aleqa Hammond Siumumut uteqqinnini pillugu: Akueriinnarsiuk
Taamnali 6.818-init taaguunneqarpoq, ukiorli ataaseq qaangiutiinnartoq uppisinneqarluni.
Taassuma Namminersorlutik Oqartussat aningaasaataannik 204.000 koruuninik namminermut atuisimanerata kingorna Naalakkersuisut siulittaasuattut tunuarpoq. Tassanngaanniilli ukiut marluk qaangiunneranni 3.759-inik taaguunneqarluni Folketingimut qinigaavoq. Tassani folketingip aningaasaataanik namminermut 13.000-inik atuisimanerarneqareerluni Siumumit ilaasortaajunnaarsinneqarpoq.
Qinersisarut pissaaneqarput
Suliat taakku qanoq innarliitigisimassanersut Siumumut ilaasortaalluni qanoq qinerneqartigissanerata takutikkumaaraa, Jensine Berthelsen isumaqarpoq.
- Naluara Siumumut iluaqutaassanersoq, tassami Aleqa Siumumiikkallarami qinersiserpassuaqarnikuuvoq. Nunatta Qitornaani appariangaatsiarnikuuvoq. Tassa qinersisartut tatiginninnerat qanoq innersoq tassani assiliaq ersissinneqarpoq.
- Imaassinnaavoq politikkikkut suleqataarusussutsimi aqqani nammineerluni iluarsiniarsinnaagaa qinersisartunut qanoq kiinnernissani.
Aleqa Hammodili qinerneqarluartarumaartoq Siumup ilimagerpasippaa.
AAMMA ATUARUK Inuit Aleqa Hammondip Siumumut uternera pillugu: Sooruna?
Naalakkersuisoqatigiit piffissami ingerlasumi imaannaanngitsumik aqqusaagaqarput. Ilaatigut Pele Broberg naalagaaffeqatigiinneq pillugu kalaaliussuserlu pillugit oqaaseqartarnerata kingunerisaanik nunanut allanut tunngasunut naalakkersuisuuffini annaavaa.
Tamannalumi Siumumit arajutsineqanngitsoq, Jensine Berthelsen naliliivoq.
- Tassami partii sunaluunniit inissisimanermi sajuppiluttoqarpat piareersanngikkunik imminut aaginnartussaavoq. Taamaattumik pissusissamisoorunarpoq Siumup massakkut naalakkersuisooqatigiit aalaqqajullattaaneranni arlaannik pisoqarsinnaaneranik sillimmartaarluni piareersartoq.
