Inuit Aleqa Hammondip Siumumut uternera pillugu: Sooruna?
Aleqa Hammond Siumumi ilaasortaaleqqippoq.
Taanna partiimi 2016-imi ilaasortaajunnaarpoq, tamatumalu kingorna attaviitsooriarluni Nunatta Qitornaani ilaasortaalerpoq.
Aleqa Hammondip aningaasaqarnera Siumumi ilaasortaanerata nalaani qasseeriarluni tamanit oqallisigineqarpoq.
Siumup siulittaasuata, Erik Jensenip partiimi nukiit tamaasa pisariaqartinneqartut oqaatigaa, Aleqa Hammondillu ilugersunartumik iliuuseqarnikuusimanera ajornartorsiutaannginnerarpaa.
Nuummi aqqusinermi naapitatta Aleqa Hammondip Siumumut uteqqinnera assigiinngitsunik isumaqarfigaat.
Emiia Holmip tamanna pissusissamisoorsoraa.
- Uanga ajorinngilara uteqqikkuni, peerneqarneqarnera uggornarami. Iluamik ingerlaqqissinnaaguni tatiginartunngortussaagami.
- Inuk kinaluunniit kukkusarami. Soorunami taanna kukkussuffiginikuusaa Aleqap paasivaa. Taava uanga isumaqarpunga uteqqikkuni taamatut isioqqinnissaa ilimaginngilara. Qinerluarneqassaaq qinerseqqilerutta.
Akuersaarneqarsinnaanngitsoq
Paornánguak Johnsen Jessenip Aleqa Hammondip Siumumit isumakkeerfigineqarluni partiimut uterteqqinneqarnera paasiuminaatsippaa:
- Eqqarsariartorujussuuvunga soormitaavana utertikkaat? Immaqaana Siumut partiaat arpariartulermat annaanniarlugu uterteqqikkaat. Uannut eqqarsarnarpoq.
- Ernumanartoqartippara, qinerseqqinnissaq tulleq appaqqinnissaat ilimagisinnaavara. Taamatut uteqattaarunik tatiginassuseq aamma ileqqurissaarnerillu innarlerneqartaramik.
Bent Lundbladillu Aleqa ammondip Siumumit ilaatinneqaqqilernera akuerineqarsinnaanngissoraa.
- Siumuminngaanniit taamatut akileraartut uaguusugut aningaasaatitsinnik atornerlueriarsinnarluni partiimut uterteqqinneqarnera akuerineqarsinnaanngilaq.
- Paasiuminaaqaaq, uani akerliusarlutik pigamik taamani Karl-Kristian Krusep oqaaseqarnikuuvoq, taamatut ajortuliortut akuerineqarsinnaanngitsut inissaqartinneqanngitsulluunniit, kisianni sooq taavalu taamatut iliorpat?
