Kujataani namminersortoq: Politikkikkut aaqqiagiiginnermut akuutitaalerpugut
Kujataani takornariartitsisartunut, sikorsuit pissutigalugit isertitassaraluaminnik annaasaqarsimasunut ikiorsiisoqarnissaanik suliaq, nalorninartoqaqisumik ingerlanneqarnikoq, iliuuseqarfigeqqinneqarnianngilaq.
Naalakkersuisut imaluunniit Aningaasaqarnermut Akileraartarnermullu Ataatsimiititaliaq, maannakkuugallartoq suliamik ingerlatitseqqikkumanngillat, taamaammallu namminersortut imminiiginnarneqarpasillutik.
Taakkua ilagaat Pitsi Høegh, suliffeqarfimmi ’Greenland Sagalands’-imi pisortaq (siusinnerusukkut Siumut sinnerlugu Inatsisartuni ilaasortaanikuusoq).
Nammineq aamma annertuumik eqqugaagaluarluni takornariartitsinermik ingerlatseqatini ernumagineruai:
- Suliffeqarfiit qulit pallimavagut maanna pisunik qanorlu kipiluttunarsiortoqartigineranik oqaloqatigiittartut. Annermik suliffeqarfinni aallarterlaani, annertuunik aningaasalersuisimasuni.
Politikkerneq– ajornartorsiutinik qaangiiniarneq pinnagu
Pitsi Høeghip imminut Kujataanilu takornariartitsisartunut allanut sunniutaasussat ernummatigai.
Amerlanerit maannamut ukioq manna isertitassatut naatsorsuutigisaraluamik ilarpassui annaanikuuaat.
Taamaammat aamma pakatsissutigivaa Naalakkersuisut aasaq manna neriorsuutigisaattut ikiorsiisoqanngimmat:
- Neriorsorneqarpugut. Taavali isumaqatigiinnginnerit pilerput - paatsiveqanngillat. Maanna pisut imaannaanngeqaat. Isertitassaraluatta affaat tassanngaannaq annaavagut.
Takornariartitsisartup pissusiviusunik paasinninnera naapertorlugu, maanna pineqartoq tassaavoq politikki, inuit ikiorserneqarnissaminnik pisariaqartitsisut pineqaratik:
- Takornariartitsinermik inuussutissarsiuteqartuusugut politikerit akornanni kiggiguteqqasutut misigivugut. Mannami politikkimut tunngariasaalerpoq, ungasissorsuungitsukkut qinersisoqarnissaa pissutigalugu. Isumaqatigiinnginniaannarluni isumaqatigiinngitsoqarpoq.
Utoqqatsissut eqquumiitsoq
Aningaasaqarnermut Akileraartarnermullu Ataatsimiititaliap ikiorsiissutissanik itigartitsinermini tunngavilersuutigaa Inuutissarsiornermut naalakkersuisumit, Naaja Nathanielsenimit, qinnuteqaat tukappallaarlunilu eqqunngippallaartoq.
Ikiorsiinissamik pisariaqartitat qanoq annertutiginissaat missingerneqarsimavoq. Ataatsimiititaliamut ilaasortat erseqqissaqquaat, qassit ikiorserneqarnissaminnik pisariaqartitsinersut, ikiorsiissutillu qanoq annertutigissanersut.
Kisiannili nassuiaat tamanna Pitsi Høeghip akueriuminaatsippaa:
- Kisitsisit eqqoqqissaartuusimannginnerarlugit tunngavilersuineq tupigivara. Sulimi nalusarput pillugu qinnuteqaasiorsinnaanngilagut, oqarpoq.
Utoqqatsissut eqqumiitsoq
Pitsi Høegh pakatsivoq. Inuussutissarsiummik ingerlatseqatini tamaasa sinnerlugit. Kisianni kikkut pisuutissanerlugit oqaatigiuminaatsippaa:
- Naalakkersuisut ataatsimiititaliarlu tamarmik. Kina qanoq oqarsimanersoq naluara. Kisianni eqqumiippoq annaaneqartut matussuserneqarnissaannik neriorsuisoqarmat, kingornagulli isumaqatigiinngitsoqalerluni.
- Naluara Naaja Nathanielsen, piumasami uteriisissutiginissaanut sanngiippallaarsimanersoq, imaluunniit Naaja akerlilerniarlugu siumoortumik aalajangiussisoqareersimanersoq. Kisianni uggornaqaaq.
