Tysklandimi naalakkersuisut ministeriisa ilaat soraarsitaareernerani ajalusoortut
Tysklandip forbundskansleria Olaf Scholzip aningaasaqarnermut ministerertik Christian Lindner De frie Demokraterineersoq soraarsippaa.
Scholz socialdemokratiusoq (SPD) tusagassiortunik pingasunngornermi unnukkut katersortitsinermi taama nalunaarpoq.
Tassa Tysklandimi naalakkersuisoqatigiit taamaasillutik isasoorput.
Socialdemokratit SPD-kkut, De Grønne aamma De frie Demokrater (FDP) Tysklandimi tassa naalakkersuisoqatigiikkunnaarsimalerput.
Ministerit partiiminneersut tamarmik naalakkersuisoqatigiinnit tunuarnerannik FDP Christian Lindnerip soraarsitaanerata kingunitsiannguagut nalunaartoq, nutaarsiassaqartitsivik AFP allappoq.
Tamanna tyskit innuttai qinersiaartussanngornerannik kinguneqarpoq. Qinersinissaannummi piffissaliunneqartoq aatsaat aappaagu septemberimi pisussaagaluarpoq.
Nunaminni aningaasaqarneq 2023-mili ingerlalluarpallaarunnaariartortoq 2024-milu ajorseriaannassangatinneqartoq qanoq ilorraap tungaanukartinneqassanersoq partiit taakkua isumaqatigiinngissutigisaannut ilaavoq.
Coronap kingunerluutai Ukrainemilu sorsunneq Tysklandip aningaasaqarnikkut ajornartoorneranut pissutaaqataapput.
