Kujataani takornarialerisut sikorsuarnik peqquteqartumik ikiorseqqunerat itigartinneqartoq

allaaaserisaq nalunaaqutaq 12.35 nutartigaavoq. Tassani Kommune Kujallerup borgmesteria, Stine Egede (IA) aamma oInatsisartut Aningaasaqarnermut Akileraartarnermullu Ataatsimiititaliaata siulittaasua , Peter Olsen (IA) oqaaseqarput.

Kujataani takornarialerisut sikorsuarnik peqquteqartumik kaaviiaartitakinnerulerput. Taakkuali imminnut napatiinnartariaqassapput.

Kujataanimi takornarialerisut ikiorseqqullutik qinnuteqaataat Inatsisartut aningaasaqarnermut ataatsimiititaliaata itigartippaa.

Inuussutissarsiornermut, Niuernermut, Aatsitassanut, Inatsiseqarnermut Naligiissitaanermullu Naalakkersuisoqarfik tusagassiorfinnut taama nalunaarpoq.

Tamannalu naalakkersuisumit inuussutissarsiornermi akisussaasuunerpaasunut ilaasuusumit Naja H. Nathanielsenimit isornartorsiorneqarpoq.

- Aningaasaqarnermut ataatsimiititaliap itigartitsineranut pakatsillungalu paasisinnaanngilara. Piffissami inuussutissarsiutit ineriartortinneqarnissaannut pisariaqartumi siumut ilimagineqarsinnaanngitsup, ajornakusoortullu iliuuseqarfigineqarnissaannut Kujataani inuussutissarsiutillit ikiorusunneqannginnerat annertuumik eqqarsarnartoqartippara.

Ikiorserneqarnissamik neriorsorneqaraluartut

Ikiorneqalertupallakkusunnerallu tusaagini, inuutissarsiornermut naalakkersuisup juulimi oqaatigaa.

- Pisinnaasarput tamaat aaqqiissuteqapallanniarsarivugut, nukinginnartormi nalunngilarput, taanna KNR-imut taamani oqarpoq.

Takornarialerisulli ikiorseqqunerat tassa itigartinneqarpoq.

Kommune Kujallerup borgmesteriata, Stine Egedep (IA), itigartitsineq naammagisimaanngeqaa.

- Qasuummernaqaaq. Taama oqartariaarpunga. Naalakkersuisoq akuersaartumik aallaaveqartutut misigivikkaluarakku, taanna oqarpoq nangillunilu:

- Ukioq manna sikorsuaqarnersua sakkortullunilu immikkuuIllaarilluinnarmat, suliaq naammassilertorneqassasoq naatsorsuutigigaluakku. Kisianni Aningaasaqarnermut Akileraartarnermullu ataatsimiititaliami taamaassimarpasinngilaq, tamannalu ilumoortumik qasummiutigaara.

Takornarialerisuinnaat pinnatik aamma Kujataani aalisartut piniartullu ilungersunartorsiortut, Stina Egede oqarpoq. Aalisartut piniartullu arlallit qaammatini pingasuni isertitaqarsimanngitsut taanna oqarpoq.

- Ingammillu nipisanniarfiup nalaani ukioq maanna allaavoq. Tassalu ilungerssunartorsiorput, Stine Egede oqarpoq.

Borgmesteren Aningaasaqarnermut Akileraartarnermullu Ataaatsimiititaliaq sooq itigartitsisimanerluni nasssuiaanissaa taassuma amigaatigaa.

Inatsisartut Aningaasaqarnermut Akileraartarnermullu Ataatsimiititaliaata siulittaasua Peter Olsen KNR-imiit attavigaarput:

- Sooq Itigartitsinermik inerneqarnersoq oqaaseqarsinnaanngilanga, Inuit Ataqatigiimmi avaqqullugit amerlanerussuteqartut taama aalajangiipput.

- IA-miit uagut qinnuteqaat akuererusukkaluarparput,aalisartunut, piniartunut takornarialeriusunullu kingunerusussat ernummatigigatsigit,  Inatsisartut Aningaasaqarnermut Akileraartarnermullu Ataatsimiititaliaata siulittaasua Peter Olsen ilisimatitsivoq.