Naalakkersuisoq: Dronerujussuit nunatsinnit aamma aqunneqalerumaarput

Illersornissaqarfiup dronerujussuassartaavi ungasianiit aquttakkat marluusut Aalborgemit aqunneqassasut Danmarkip illersornissamut ministereqarfiata nalunaarutigimmagu, tamanna Folketingimi ilaasortanit nunatsinneersuusunit, tassa Aaja Chemnitzimit (IA) aamma Aki-Matilda Høegh-Damit (Siumut) isornartorsiorneqangaatsiarpoq.

Illersornissaqarfiup dronerujussuassartaavi marluusut Issittumi aamma Atlantikup Avannaani nakkutilliissutaasussat nunatsinni annaassiniarnermi aamma atorneqartassapput.

Taamaammat Illersornissaqarfiup dronerujussuassartaavisa nunatsinniit 3000 kilometerit missarluinnaannik ungasitsigumit, tassa Aalborgimit aqunneqassasut nalunaarutigineqarmat, Folketingimi ilaasortat nunatsinneersut tusangiatsapput. Taakkualu marluullutik tusangiatsannerminnut tunngavilersuutitik pillugit DR-imut oqaaseqarput.

- Dronerujussuit taakkua Aalborgimit aqunneqartussat Issittumi ilumut nakkutilliissutaassanersut aamma Issittumi Piginnaasanik Annertusaanermik isumaqatigiissummi ilaatinneqarnersut paaserusuppara. Aalborgimi Issittumiinngilaq, Aaja Chemnitz DR-imut sapaatit akunnerata siuliani oqarpoq.

Taassumalu isornartorsiutaa Siumumeersumit Aki-Matilda Høegh-Damimit ilalerneqarpoq.

- Dronerujussuimmi Issittumi nakkutilliissutaalersaartut nakkutilliiffigisassamiit 3.000 kilometerit sinnerlugit ungasitsigisumiit, tassa Aalborgimit aqunneqassasut paasinarsivoq, tamannalu annaassiniarnernut nakkutilliinermullu tunngatillugu kipilittunartorsiornermik malitseqartumik kinguaattoortoqartarneranik kinguneqarsinnaavoq, taanna DR-imut oqarpoq.

Naalakkersuisut Danmarkip naalakkersuisuisa dronersuit taakkua sumi inissinneqarnissaannut isumaqagitiginninniarneranni peqataatinneqarsimanngitsut, nunanut allanut tunngasuni naalakkersuisoq Siumumeersoq Vivian Motzfeldt oqaloqatigigatsinni oqarpoq. Danmarkilli naalakkersuisuisa taama aalajangernerat, taassuma tupaallaatiginngilaa.

Dronerujussuit taakkua Issittumi Piginnaasanik Annertusaanermik isumaqatigiissummi 2022-meersumi ilaatinneqarput. Dronerujussuillu taakkua Danmarkimi aserfallatsaaliorneqarlutillu tassannga aqunneqassasut, isumaqatigiissummi tassani allaqqavoq.

- Danmarkimi naalakkersuisut isumaqatiginninniarnerminni dronet taakkua sumi inissinneqarnissaannut tunngasumik aalajangerneranni, Naalakkersuisut peqataatinneqanngillat. Danmarkimi naalakkersuisut nunaminni suliffissaqartitsinissaq pillugu aalajangiinissani akisussaasuupput, taanna KNR-imut oqarpoq.

Nunatsinni suliffeqarfiit ukkatarineqartut

Dronerujussuillu taakkua nunatsinnit aamma aqunneqalerumaartut, Siumumeersoq Vivian Motzfeldt isumaqarpoq.

Taanna Naalakkersuisut Illersornissaqarfiup nunatsinni Issittumilu sillimaniarnermut tunngasuni suliassai pillugit isumaqatiginninniarnermi peqataatinneqarnissaat oqaloqatigiissutigiartorlugu Danmarkip illersornissamut Københavnimi ministereqarfianeeqqammerpoq.

Issittumi Piginnaasanik Annertusaaniarneq tassani oqaloqatigiissutigaat, isumaqatigiissummi tassani ilaatinneqartut nunatsinnut attuumassutiliusut qanoq isikkoqassanersut aatsaat eqqartuleruttormatigit. Danmarkimi naalakkersuisut partiillu arlallit Illersornissaqarfiup Issittumi aamma Atlantikup Avannaani suliatigut Piginnaasanik Annertusaanermik 2022-mi isumaqatigiissuteqarput. Naalakkersuisut peqataatilluinnarlugit taamaaliorput.

Illersornissaqarfiup nunatsinni sillimaniarnermi suliai nunatsinni inuaqatigiinnut illuaqutaanissaat, Vivian Motzfeldtip isumaqatiginninniarnermi kissaataanut ilaavoq.

- Pingaarutilerujussuuvoq, nunatsinni suliffeqarfiutitta suliassanut dronet suliarisassaatut assingusumik kivitsisinnaasut taakkua isumaqatiginninniarnermi aamma ukkataralugit pitsaasumik naammassinniffiunissaannut suliaqarnissaq, taanna oqarpoq.

Dronerujussuinnaq tunnganngitsoq

Ungasianiit aquttakkanik marlunnik droneserujussuarneq 76-inik atorfinitsitsinermik malitseqassaaq. 70-inik Aalborgimi timmisartoqarfimmi atorfinitsitsisoqassasoq, Danmarkip illersornissamut ministereqarfia ilisimatitsivoq.

Dronerujussuillu tassa Alborgimi inissisimatillugit nunatsinni inuiaqatigiivisa iluaqutigisinnaanavianngikkaat, Aaja Chemnitz DR-imut oqarpoq.

Avataaniit suliartortitsinani kalaallinilli Illersornissaqarfiup nunatsinni suliaanut tunngasutigut piginnaanngorsaanissaq pingaarnerusoq, Vivian Motzfeldt oqarpoq.

- Pingaarnerpaatut oqaatigilara, assiliaq tamakkiisoq qiviarusunneruara. Dronenuinnaq tunngassuteqanngilaq, inerisaanerit allarpassuit aamma isumaqatiginninniarnermi ilaapput.

- Soorlu oqareersunga, kalaallinik piginnaanngorsaanissaq pingaartipparput, naak dronerujussuit Danmarkimiinnissaat Danmarkimi naalakkersuisut aalajangereeraluaraat. Uagut dronet nunatsinnut qanoq atassuserneqarnissaannut tunngatillugu kalaallit peqataatinneqarnissaat isumaqatigiinninniarnermi tikittussaavarput, Vivian Motzfeldt oqarpoq.

Nunatsinni nakkutilliissutissanik annaassiniarnermilu atorneqarsinnaasunik allanik mikinernik arlalinnik dronesinissaq, Issittumi sillimaniarnikkut Piginnaasanik Annertusaaniarneq pillugu isumaqatigiissummi aamma ilaatinneqarpoq.

Danmarkip dronerujussuassartaavi marluusut amerikamiut sanaarigaat MQ-9B SeaGuardianitullu ittuusut, DR allappoq. Dronerujussuillu taakkua marluk 750 millionit koruunit 2,7 milliardit koruunillu akornanni akeqassangatinneqartut, DR aamma allappoq.