Trumpip ajugaanera pillugu assigiinngitsunik isummersortoqartoq: Immaqa tamatta pisiarissaqaatigut
Donald Trump republikanerit sinnerlugit USA-mi præsidentissattut qinigaaqqippoq, Sisimiuni innuttaasut ilaannit pissanganartutut ilaatigut nalilerneqarpoq. Innuttaasullu naapitatta eqqaamalluarpaat Donald Trumpip nunarput pisiarerusullugu oqaaseqarnikuunera.
Republikanereq Donald Trump præsidentinngortussanngortoq aperisatta tusareersimavaat. Qinigaaneralu assigiinngitsunik isummersorfigaat.
- Pissanganaqaaq, Abigael Skifte oqarpoq.
Sooruna pissanganartoq?
- Tassa tusakkagut malillugit sallutunerarlugulu sakkortunerarlugu tusartariarakku. Qanoq kinguneqassanersoq, uagutsinnut sunniuteqassanersoq, assut pissanganarpoq, taanna oqarpoq.
Trumpip suliassat iluamik ingerlassavai
Donald Trumpip præsidentioqqilernermini allatut tusaamaneqalernissaa Jens Heinrichip neriuutigaa:
- Tusaamasarakku sakkortulaartartoq ilaanni, eqqartorneqartarnera, neriuppunga taamatut tusaamanerlunneqarunnaaminerussasoq, suliai iluamik ingerlassasut, Jens Heinrich oqarpoq.
Donald Trumpilli præsidentitut aappaagu 2025-mi januaarimi ivertinneqarpat piginnaasai inuit ilaannit apeqquserneqarput.
- Akerliulaaraluarlunga kisianni allatut ajornaqaaq, taakku nunaminni pissutsit taamaassammata qinerpaat, allatut ajornaqaa, Julius Filemonsen oqarpoq.
- Ajoqaaq, Bina Lundblad oqarpoq, nangillunilu:
- Immaqa pisiarinialerpaatigut tamatta, hahahahaha! Pisiarerusunnikuummatigut, taanna illaatigaluni oqarpoq.
Nunarsuarmi nunat pissaaneqarnerpaat
USA-mi præsidentissarsiorlutik qinersinerat qaangiussimalerpoq, qinersinissallu tungaanut Kamala Harrisip Donald Trumpillu aningaasanik dollarinik millionilikkuutaanik nalilinik oqallinnerannut, naalagaaaffinnilu amerlasuuni qineqqusaarnerpassuinut Sisimiuni innuttaasut minnerusumik annerusumilluunniit malinnaasarsimapput.
- Ilaana, malinnaaffigisorujussuuara, tassami nunarsuarmi pissaaneqarnerpaaq naalagaaffik qinersivoq, Peter Møller oqarpoq.
Innuttaasut naapitatta eqqaamalluarpaat Donald Trumpip USA-mi kingullermik præsidentiunermini Nunarput pisiarerusullugu oqaaseqarnikuunera.
- Aamma tupinnanngilaq, imaappormi; Nunarput aatsitassaqarfissuuvoq kisianni atorneqanngitsunik, asuli nalinginnarmik annissuisoqarluni. Taamaammat pissangagisorujussuuvara qanoq inissinnissaa ukiuni tulliuttuni, aatsitassat eqqarsaatigigaanni, Peter Møller nangilluni oqarpoq.
- Kalaallit Nunaat pisiariumallarmagu, immaqa assigiinngitsutigut, niuernerup tungaatiguusinnaavoq arlaatigulluunniit, immaqa ammaassisuusimaratarsinnaavoq, Julius Filemonsen oqarpoq.
Arnamik inuusukannersumik qinigaasoqarnissaa neriuutigineqartoq
KNR-ip naapitaasa amerlanerit Kamala Harrisip qinigaanissaa neriuutigisimagaluarpaat.
- Taanna arnaq qinigaaqqullaraluarakku, tassami utoqqaannginnerorpasimmat. Ilaa ... utoqqaanermik taanna Trumpi aamma … eqqarsarlunga; soormitaavaana utoqqaannaavissuarnik præsidenteqartartut? Abigail Skifte aperivoq.
Kamala Harrisip præsidentinngorniunnermi qinigaanissaa Bina Lundbladip neriuutigisimagaluarpaa.
- Neriukkaluaramaana taanna arnaq ajugaassasoq, arnaammat, tapersersoraluarakku uanga, taanna oqarpoq.
Arnaanera pinerullugu?
- Naamik, malinnaaffiginerani suliniutissani præsidentiunissanilu assut pilerigerpasikkaluaramiuk, soorunami ajorsartunnguakkuluuvoq, ajoqaaq. Kisiannimi allatut ajornaqaaq, Bina Lundblad oqarpoq.
Peter Møller oqarpoq, præsidentinngorniuttuni sorleq qinigaassanersoq namminerminut apeqqutaavallaanngitsoq.
- Uannut soqutaavallaanngilaq, kisianni pingaartorujussuuvoq nunarsuarmi eqqissisimanissaq, toqqissisimanissaq, taanna oqarpoq.
Donald Trump USA-mi maannnamut præsidentiusimasut 47-ssaraat. USA-p tunnngaviusumik inatsisaa naapertorlugu amerlanerpaamik marloriarluni præsidentiusoqarsinnaavoq.
