Ikiorsiisinnaanermik oqallinneq sangutitaasoq: Ataatsimiititaliap Peter Olsen naammagittaalliutigaa
Kujataani sikorsuaqarnerujussua pissutigalugu takornariaqarnermik suliallit ikiorserneqarsinnaanissaannut qinnuteqaatip itigartitsissutigineqarnerani oqallinnermut tunngasunik allaaserisaqaaluppoq.
Namminersortut aningaasanik ikiorserneqanngitsuuinnalersut, inuussutissarsiornermut naalakkersuisoq tallimanngornermi oktobarip ulluisa 18-ianni oqarpoq.
Taassuma kingorna ataatsimiititaliap siulittaasua, IA-meersoq Peter Olsen, ataatsimiititaliap aalajangernera pillugu oqaaseqarpoq.
Taanna KNR-imut ilaatigut ima oqarpoq:
- IA-miit uagut qinnuteqaat akuererusukkaluarparput, aalisartunut, piniartunut takornarialeriusunullu kingunerusussat ernummatigigatsigit, Peter Olsen ilisimatitsivoq.
Minnerunngitsumik Naaja Nathanielsenip naalakkersuisut sinnerlugit qinnuteqaataa, Naleqqameersup Pele Brobergip aamma Siumumeersup Kuno Fenckerip, tukannerarlugu isornartorsiorpaat.
Pisulli tamaanga killinngillat, suliarmi tupaallannartoqarpoq.
Siulittaasoq suleriutsimik unioqqutitsisoq
Aningaasaqarnermut akileraartarnermullu ataatsimiititaliap siulittaasuata ataatsimiinnermi oqaluuserisat imarisaannut tunngasumik oqaaseqarsimanera oktobarip ulluisa 18-ianniilli maannamut suli qassiiliuutaasoq assortuussutaaqisorlu, ataatsimiititaliami tassani ilaasortat oqaloqatigigatsinni paasinarsivoq.
IA-meersoq Kristian Jeremiassen Peter Olsenip iliuuserisimasaa pillugu oqaaseqartunut ilaavoq:
- Suleriuseq una atugarput aningaasaqarnermut ataatsimiititaliap sulinera tusagassiutit aqqutigalugit isumaqatiginninniarnerit aammalu isummersornerit ingerlanneqassanngitsut Inuit Ataqatigiinninngaanniit kissaatiginartipparput. Taavalu ataatsimiititaliami sulineq taanna matoqqasuusarmat aamma suleriuseq malillugu ataatsimiittarfitsinni suliaq suliartineqassammat, taanna oqarpoq.
Ataatsimiititaliaq siulittaasup Peter Olsenip saqqummiussaanut isumaqataannginnerminut KNR-ip paasisai naapertorlugit pingasunngormalli allagaqarpoq.
Allakkalli taakkua suli saqqumminngillat, allakkammi taamaattut saqqummiunneqartinnatik siulittaasumit, tassa Peter Olsenimit, atsiorneqarsimasussaasut, Inatsisartut suleriaasiat pillugu najoqqutassiami allaqqavoq.
Tassa ataatsimiititaliap siulittaasuata oqaaseqarsimanera suli aaqqiivigineqanngilaq, qassiiliuutaaneruleraluttuinnarlunilu. Siumumeersoq Kuno Fencker Peter Olsenimik suli tatiginninninersoq tamanna erseqqinnaarpoq:
⁃ Tamanna pillugu oqaaseqarsinnaanngilanga. Ataatsimiititaliami tamanna oqaluuseraarput. Qanorlu kinguneqassanersoq tamatuma kingorna nalunarumaanngilaq, Kuno Fencker oqarpoq.
Ataatsimiititaliami ataatsimiinneq unitsinneqartoq
Ataatsimiititaliamimi perulluliuutaasoq suli aaqqiviginiarneqaleruttorput.
Tamannarpiarlu aningaasaqarnermut akileraartarnermullu ataatsimiititaliami tallimanngormat immikkut immikkut ataatsimiissutigigitsik, Naleqqap siulittaasuata Pele Brobergip ataatsimeereernerminni uppernarsarpaa:
- Peter Olsenip taama saqqummiussaqarsimanera Naaja Nathanielsenillu ikiorsiissuteqarnissaq pillugu oqaaseqarsimanera oqaluuseriniakkatsinnut ilaapput, Pele Broberg oqarpoq.
Ataatsimiinnerli qanoq inerneqarnersoq Pele Broberg aperigatsinni, ataatsimiinnertik iluatsissimanngitsoq oqakumisaarpoq:
- Ataatsimiinnerput naammassinissaanut piffissaliussaq sioqqullugu unitsinneqartoq oqaatigisinnaasatuaraara. Sooq unitsinneqarnersoq naluara, Pele Broberg oqarpoq.
Taamaammat ikiorsiinissaq Peter Olsenillu saqqummiussinerata naammagittaalliutigineqarnera pillugit suliat suli naammassinngillat. Ataatsimiititaliarli qanoq aaqqiinissamik siunertaqarluni ullumi ataasinngornermi ataatsimeeqqippoq.
