Ikiorseqqusunut itigartitsineq IA-p Siumullu akornanni isumaqatigiinngissutaasoq

Kujataani sikorsuaqarnerujussua pissutigalugu takornarianik sullissisut angallassinissanik taamaatitsiinnartariaqaleramik aningaasarsiassaraluaminnik annaasaqarput, taakkuli ikiorserneqarnissaannut qinnuteqaat sapaatip-akunnerata siuliani itigartitsissutigineqarpoq.  

Takornarianik sullissisut aningaasanik ikiorserneqarnissaannut qinnuteqaammik Aningaasaqarnermut Akileraartarnermullu Ataatsimiititaliaq itigartitsisuuvoq.  

Taama ikiorserneqarnissaq inuutissarsiornermut naalakkersuisup Naaja Nathanielsenip juulimi neriorsuutigereeraluarpaa.

Itigartitsinerli nassuiaatissartaqartoq ataatsimiititaliami ilaasortaq Siumumeersoq, Kuno Fencker, oqarpoq.

- Naalakkersuisuninngaanniit qinnuteqaammik tigusaqarpugut, taannalu qinnuteqaat Kujataani takornariaqarnermut suliffeqarfiit ajornartorsiulersinnaasutut inissisimanerarlugit eqqoriaanertut nipeqarpoq, kisianni tigussaasumik takusaqarnikuunngilagut suliffeqarfinnik ajornartorsiortunik, taaanna oqarpoq.   

Suliffeqarfiilli ilaasa eqqorneqarnissaat Naaja Nathanielsenip ataatsimiititaliamut aningaasanik qinnuteqarnermini tunngavilersuutigisimagaa, Kuno Fencker oqarpoq.

- Kisianni suliffeqarfiit assigiinngitsut pisariaqartitsisut suunersut kikkuunersullu paasinikuunngilagut, taanna oqarpoq.

Taamaattumillu 25 millionit koruunit qinnutigineqartut akuerineqarnissaannut tunngavissaqanngitsoq, taassuma oqaatigaa.

Qinnuteqaat amigaatilik

Ataatsimiititaliami siulittaasup tullia, Pele Broberg (N), aamma taama isumaqarpoq. Naaja Nathanielsenimmi qinnuteqaataa tukalluinnartoq, taanna oqarpoq.

Qinnuteqaallu ikiorsiinissamut pisariaqartitsivittoqarneranik takussutissiinngitsoq Naleqqap siulittaasua aamma isumaqarpoq:

- Qinnuteqaat tukappoq paasissutissartakillunilu. Paasissutissanillu piniaraluaratta tunngavilersuutigineqartut suli naammanngitsut misigaagut, taanna oqarpoq nangillunilu:  

- Aningaasat qinnutigineqartut taama amerlatigisut imaaliallaannarluni tunniunneqarnissaat ataatsimiititaliamiit tunngavissaqartinneqanngilaq. Ikiorsiissutit inatsisinik tunngavissartaqanngitsut nalaatsornerinnakkut neriorsuutigiinnarsinnaanngilagut.

Aningaasat taama amerlatigisut piariivinneqanngitsumik ataatsimiititaliamut qinnuteqaatigineqarnerat, Pele Brobergip tupaallaatigaa.  

- Taama tunngavissakitsigisumik 25 millionit koruunit ikiorsiissutigiinnarneqarsinnaanngillat. Kikkunnut iluaqutaassanersut, qanoq iluaqutaassanersut sumilu iluaqutaassanersut naluarput.

- Taama ikiorsiissuteqarniaraanni kammalaatersortoqarneranik oqartoqarsinnaavoq. Erseqqissumik pilersaaruteqartoqanngippat, taava ataatsimiititaliamit taama ikiorsiissuteqarnissamut akuersinissaq ajornakusoorpoq.

Naalakkersuisut pissaaneqarniartut

Qinnuteqaat amigaqisoq naalakkersuisut pissaaneqarusunnerannik takutitsisoq, Pele Broberg isumaqarpoq.

Naalakkersuisoqatigiittaaq amerlanerussuteqarnertik atorlugu apereqqaaratik tunngavilersuilluaqqissaaqqaaratillu sunik tamanik akuersisitsisarneq sungiutiinnarsimavaat:   

- Taperserneqarnissaq qulakkeeqqaanngikkaluarlugu neriorsuuteqarneq ileqquliunneqarsimasoq ilimagaara.

- Ataatsimiititaliami oqallisiginninnitsinni tunngavilersuilluarneq qitiusussaavoq, naalakkersuisoqatigiinnullu tunngasut aallaavigineqassanngillat, taanna oqarpoq.

Naalakkersuisoqatigiinnerluleqqajaaasut

Qinnuteqaammilli itigartitsineq naalakkersuisoqatigiit patajaakkunnaamisaarnerannik aamma takutitsivoq.

Pingaartumik Naaja Nathanielsen ataatsimiititaliami taperserneqannginnami aasaq neriorsuutigisaraluaminik piviusunngortitsisinnaajunnaarnerata kingorna tamanna erseqqinnerulerpoq.  

- Suliffeqarfinnik ajutuulersunik ajornartorsiuissortunik tigussaasumik takusaqarnikuunngilagut, taamaattumik Aningaasaqarnermut Akileraartarnermullu Ataatsimiititaliaminngaanniit massakkuugallartoq itigartitsivugut, Siumumeersoq Kuno Fencker oqarpoq.  

Ataatsimiititaliamittaaq taperserneqannginneq siornatigutut naalakkersuisoqatigiilluartoqarunnaarneranik ersersitsisoq Naleqqap siulittaasua aamma isumaqarpoq:

- Naalakkersuisoq taama qulanngitsigaluni neriorsuisinnaaguni naalakkersuisoqatigiinni partiinit taperserneqanissamik naatsorsuuteqaannarsinnaassanersoq apeqqusernarsinnaavoq, Pele Broberg oqarpoq.   

Aammattaaq ataatsimiititaliap sulinera pillugu naalakkersuisup tusagassiuutinut oqaaseqarnera eqqarsarnartoqartinneqarpoq:  

- Naalakkersuisup siunnersuutini ataatsimiitsitaliami taperserneqanngippat isornartorsiuisarnera pissusissamisuunngilaq, Pele Broberg oqarpoq.

Ikiorsiissutinik aningaasaliisaqattaartarneq Pele Brobergip isumaqataaffigiuaannarneq ajorpaa.

Tunngavilersugaalluarnerusumilli ataatsimiititaliamut qinnuteqartoqaqqissappaat ikiorsiisoqarsinnaanissaa, Aningaasaqarnermut Akileraartarnermullu Ataatsimiititaliami siulittaasup tulliata ammaffigisinnaanerarpaa.

KNR-ip Naaja Nathanielsen apersorpaa, akissutaalu aqagu sisamanngornermi saqqummiunneqassaaq.