Kujataani namminersortut politikerinit ikiorneqannginnamik pakatsisut
Kujataani sikorsuaqarnerujussua pissutigalugu eqqugaangaatsiartut ikiorserneqassanngitsut inuutissarsiornermut naalakkersuisoq, Naaja Nathanielsen, sapaatip-akunnerata siuliani nalunaarmat amerlasuut quarsaarsimassajunnarsipput.
Ikiorsiinissarmi politikerinit sapaatit-akunnialuinnaasa qaangiunneranni aaqqiivigineqareerpat namminersortut ikiorserneqassasut, Naaja Nathanielsen juulip qeqqani oqaraluarpoq.
Kujataani takornarianut sullissivimmik Tasermiut Campimik piginneqataasoq, Freddy Christensen, ikiorsiissuteqartoqarnissaanut qilanaartut ilagigaluarpaat.
- Una aningaasaqarnermut ataatsimiititaliamit itigartitsissutigineqarsimammat uggornarpoq.
Tikittoqanngippat aningaasarsiorsinnaanngitsut
Inuutissarsiornermut ataatsimiititaliap itigartitsinera pillugu Naaja Nathanielsen tusagassiorfinnut nalunaarummi sapaatit-akunnerata siuliani ilaatigut ima allappoq:
- Aningaasaqarnermut ataatsimiititaliap itigartitsineranut pakatsillungalu paasisinnaanngilara. Kujataani inuussutissarsiutillit ikiorusunneqannginnerat annertuumik eqqarsarnartoqartippara.
Kujataani sikorsuaqarnerujussua namminersortunut aningaasatigut maannamut annaasaqaataangaatsiarpoq. Tamannalu Freddy Christensenip malugilluarsinnaava:
- Umiarsuit maanga Kujataanut Nanortalimmut, Qaqortumut Narsamullu tikittussaagaluit maajip naaneraniit juulip naanissaata tungaanut 40-t sinneqartut uniinnarnikuupput.
- Aasap affaa aningaasarsiorfiginngitsoorlugu oqarsinnaavugut, isertitassat affapajaavi immaqa annaaneqarnikuupput, ajoraluartumillu sulisorisatta ilaat angerlartiinnartariaqarnikuuagut.
Suli neriuuteqartoq
Freddy Christensenilumi takornarianik sullissisartuni kisimiinngilaq. Takornarianimmi sullissisartut maanna eqqugaaqqaqisut taassuma nalunngilaa:
- Nalitoorujussuusimassaaq, tassami uagut kisitta ingerlanngilagut, suliffeqarfeerarpassuit Kujataani aamma uagutsitulli takornariaqarnermik sullissisut eqqugaarrapput. Taava taakkua ataatsimut isigissagaanni soorunami aningaasarpassuusimassapput.
Ikiorsiissuteqartoqassanngitsorli paasinarsereerpoq. Taamaattumik Freddy Christensen takornarialerisullu allat ima neriuutissatuaqarput:
- Taama sikorsuaqartigeqqissanngitsoq neriuutigiinnassavarput. Massakkut takornariaqarnerup ineriartornerani kalaallit suliaqartut amerlatsikkiartussappata aamma ajutoorfinni ajornartoorfiusuni inatsisartuniit ikiorsiissuteqartoqartarnissaa pisariaqarpoq pingaaruteqarlunilu, taanna naggasiivoq.
