Aalisarnermut inatsisissaq Royal Greenlandimut iluaqusiivallaarpoq.

Taamaannera isornartoq, Atassutip siulittaasua Aqqalu C. Jeremiassen isumaqarpoq. Taanna Inatsisartuni suleqatinilu aalisarnermut inatsisissaq pillugu oqalliseqataaleruttortunut ilaapput, taassumalu inatsisissaq tassa naammagisimaanngilaa. 

- Namimnersortuninngaanniit tigooqqaalluni ilaatigut taamannak apparsaavigalugit namminneq pisiarinikuusaat,  taamannak inissikkaanni, isigeriaaraanni toqqaannartumik immikkoortitsinerugami, taavalu inuiaqatigiit pigisaat namminersortunut unammillertussanngortillugu.

- Taannartaa eqqarsaatigalugu akueriuminaatsikkatsigu assut Atassummi, Royal Greenlandip aalisarnermut inatsisissami immikkut pineqarnerarlugu isorinnittoq Aqqalu C. Jeremiassen oqarpoq. 

Tamanna Namminersorlutik Oqartussat aalisakkerinermik suliffeqarfiutaata aalisartitseqatigiiffinnut namminersortunut aalisagartassiissutaasuninngarnit amerlaneroqisunik assigiinngitsunik aalisigartassinneqarneranik kinguneqartussaassaaq. 

Assersuutigalugu raajartassiissutit 33,33 procentii Royal Greenlandimut 20 procentiilu namminersortunut pisassiissutaapput.

- Royal Greenland kisermaassigallarnermini annertuumik akiluttuinikuuvoq, aatsaallu unammillerteqalerami akinik pavungarujussuaq inissiinikuuvoq, Aqqalu C. Jeremiassen erseqqissaavoq.

Taamaammat Royal Greenlandip immikkut pineqarnera nunatsinni aalisartitseqatigiiffiit namminersortut eqqorneqaatigingaatsiarnissaat, taassuma ernummatigaa. 

Akiitsuni isertitaminik matussuserniarsarai

Kisermaassiffiunngitsumik niuffattoqalerpat nunatta karsianut iluaqutaassasoq akileraarutitigullu isertitaqaataassasoq, Aqqalu C. Jeremiassen isumaqarpoq:

- Namminersortut taakkuupput isertitaminnik uumassuteqartut. Illuatungaani Royal Greenlandip iluanaaruteqarneruleriartornani akiitsoqaneruleriartorpoq, akiitsunilu iluanaarutiminik matussuserniarsarai, taanna oqarpoq.

Namminnersorlutik Oqartussammi aalisakkerinermik suliffeqarfiutaata ukiuni kingullerni akiitsui 3 milliardit koruunik missaanniittartut taanna aamma oqarpoq, tamannalumi ilumoorpoq.

Suliffeqarfilli piuinnarsinnaaqqullugu taama amerlatigisunik akiitsoqartoq, Royal Greenland Sermitsiamit sapaatit akunnerata siuliani apersorneqarami erseqqissaavoq:

- Akiitsoqarpallaarpugut, tamanna qularutissaanngilaq. Kilisaataatitaatsinnulli 2 milliardit koruunit missarluinnaannik aningaasalersuinerput taama amerlatigisunik akiitsoqarnitsinnut pissutaavoq. (...) Taakkununngalu aningaasalersuinerput naammassippat, nunatsinni inuiaqatigiit nutaalianik ullutsinnullu naleqquttunik ukiuni tulliuttuni 25-30-ni kilisaataateqarnissaat qularnaassaaq, Royal Greenlandip pisortaaneranut tullersorti Nils Duus Kinnerup oqartoq Sermitsiaq nittartakkamini allappoq.

Taamaakkaluarpalluunniit suliffeqarfissuaq taanna immikkut pineqartussaanngitsoq, Atassutip siulittaasua isumaqarpoq: 

- Royal Greenland immikkut pineqaraluarpalluunniit inuiaqatigiit iluaqutiginavianngilaat. 

- Royal Greenland niuffannermi soorunami peqataassaaq, imaanngilarli nunatsinni suliffeqarfiit allat ingiartutullusooq ilillugit unammillissagai. Namminersortunik ipisaanissamut atorneqartussaanngilaq, taanna oqarpoq. 

Inatsisissamik suliarinnittuunngilagut

Aqqalu C. Jeremiassenip isornartorsiutaa qanoq isumaqarfigineritsik, Royal Greenland aperaarput.

Aalisarnermut inatsisissatut siunnersuummik nammineerlutik suliarinnittuunatik politkerertavulli taassuminnga suliarinnittuusut, suliffeqarfissuup attaveqaqatigiinnermut pisortaa Merete Lindstrøm KNR-imut allakkatigut akissummini erseqqissaavoq.

Taanna akissumminni ima aamma allappoq:

- Royal Greenland suliffeqarfiit allarpassuit assigalugit niuffannermi atugassarititaasunut malinnippoq, soorlu akigititai niuffaffinni aalajangerneqartarlutik taakkunanilu atugassarititaasunik naleqqussarnissaminik pingaartitsilluni.

- Suliffeqarfipput piginnittutta sinaakkusiussaat sapinngisamik malillugit naammassisaqarluartuutinniarparput, suliffeqarfissuup attaveqaqatigiinnermut pisortaa aamma allappoq.

Royal Greenland niuernikkut iluanaaruteqarnissap saniatigut allanik aamma iluaqusiiniartussaasoq, taanna aamma oqarpoq:

- Royal Greenlandip inuiaqatigiinni suliassarpassuarnik aamma naammassisaqartarnera aamma eqqaamasariaqarpoq. Atukkatta taama ittut Kalaallit Nunaanni inoqarfiit minerit eqqorneqaratarsinnaasullu ilarpasuini, namminersortuni nappaviusinnaaanngitsuni, suliffissaqartitsinissamik aningaasarsiornissamillu periarfissippaatigut, Royal Greenland allappoq.