Heine Kaas Nuummeersoq bodybuildingimi nunat tamalaat unammineranni kuultinnallunilu sølvinnappoq

Ima nukeqartigisoqalersinnaava allaat inuttaanut taaguutitut atorneqalerluni?

Taama pisoqarsinnaavoq tassaagaanni Heine Kaas Nuummeersoq nukerujussuaqarnini pissutigalugu The Mutantimik taaneqartarami.

Taanna Tuluit Nunaanni Italiamilu angalaqqammivoq nukikkaat nunanit tamalaaneersut peqatigalugit dommerit saanni nukinnik nittarsaassilluni. Allatut oqaatigalugu bodybuildingimi nunat tamalaat unammineranni peqataaqqammivoq.

- Tuluit Nunaanneeqqammivunga UK Open peqataaffigalugu taannalu nunarsuarmi pissartanngorniunnermut anngunniunneruvoq. Tassani kuultinnappunga taamalu nunarsuarmi pissartanngorniuttuni peqataasinnaalerlunga, nunat tamalaat kattuffissuanni PCA-mi VM-imut anngunneq pillugu Heine Kaas KNR-imut oqarpoq.

Peqataaffissatut aamma nalunaarfigisaa tassaavoq World Euro Championship nunat tamalaat kattuffissuanni allami IBFF-imi nunarsuarmi pissartanngorniunnerusoq. Nunarsuarmili pissartanngorniunnerup aappaani peqataasinnaanani Heine Kaas nalunaarpoq unamminerit piffissami ataatsimi pimmata.

- Tassani sølvinnakkama ajunngeqaaq, kisianni soorunami nuannernerusimassagaluarpoq kuulti Kalaallit Nunaannut angerlaassimasuugukku, Heine Kaas oqarpoq.

VM sioqqullugu qularneq

Europamut aallartigani Tuluit Nunaanni Italiamilu dommerinut nukimi takutissornissaat eqqaagaangamiuk angusassamigut isumalluarpallaarani misigisarpoq.

- Nassuerutigisariaqarpara killiffigerusutanniittutut misigisimanngikkaluarama. Suliffinni ulapeqaanga. Timi aamma paasiuminaassinnaasarpoq. Taamaviaartinneqarsinnaavoq allanngortoqarneranik malussarfiunngitsumik. Aamma aallutama iluani imminut ajoreqqajaaneq atugaasorujussuusarpoq, Heine Kaas oqarpoq.

- Qujanartumik sungiusaasugissaarpunga aallutannullu paasinnilluartumik aappaqarlunga. Taamaattumik sungiusarluarsimanera toqqissisimassutigaara, Heine Kaas oqarpoq.

Nuummi timigissartarfinni ukiorpaalunngortuni takussaajuartuuvoq. Nunanilu tamalaani unammillersinnaanngorpoq inooriaaseralugu sakkortuumik sungiusartuartuunermigut. Sungiusarnini suli ingerlatiinnarpaa tamannalu ullaassakkut tallimap missaani aallartittarpoq ullorornerani nangeqqinneqartarluni.

- Ukiumi unammiffiusumi nutaami unammersuarnerni angisuuni peqataanissaq siunniupparput. Nunarsuarmi pissartanngorniunneq Walesimi pisussaavoq unammersuarnerillu allat Spaniami pisussaallutik. Unammersuarnerit annertuut sisamat aappaagu peqataaffigisinnaagunarpagut, Heine Kaas oqarpoq.