Nuup ilisarnaatissaanik toqqaasoqartoq
Nuuk ilisarnaatertaalerpoq. Kommuneqarfik Sermersuup illoqarfimmik nukittuumik takussutissiisumik, kulturikkut kateriffimmik aamma kinaassutsimik ersarissumik takutitsisumik unammisitsinermi ajugaasumik saqqummiussinerata kingorna tamanna erserpoq.
Unammisitsineq illoqarfiit pingaarnersaannut periusissiamit Nuuk2035-mit aallaaveqarpoq, innuttaasullu 1.000-it sinneqartut peqataapput, tassanilu illoqarfiup ataatsimoortinnissaa, kulturip oqaluttuarisaanerullu ersinneqarnissaat ilisarnaammut kissaatigineqartut, Kommuneqarfik Sermersooq tusagassiuutinut nalunaarummi allappoq.
Unammisunit marluk tamanut taasititsisoqarnissaanut ingerlateqqinneqarput, innuttaasullu titartaasartup, Bola Høegh Stigsenip siunnersuutaa “Sermitsiap Qilaataa” toqqarpaat. Ilisarnaat kalaallit qilaataannit isumassarsiaasoq ammalortuuvoq ingerlaarfigineqarsinnaasoq, taannalu Kangillinnguit avannaanni Sermitsiamut isikkiveqarluni inissisimassaaq.
Ilisarnaat Nuummi katersuuffiulissasoq
Ilisarnaat isikkivittut, naapiffittut aamma kulturimut sammisaqarfittut atorneqartussaq, taassumalu "pitsaasumik oqaluttuassartaqarnera, eqqumiitsuliornikkut pitsaassuseqarnera aamma Nuummut malunnaatilimmik ilisariuminartumillu ilisarnaatitut atuussinnaanera tunngavigalugit toqqarneqarpoq".
Bilo Høegh Stigsenip Nuummi Sipisaq Kangillermi qullilersuineq aamma suliaraa, taassuma eqqumiitsuliaq qaqqamut qilaammullu nersorinninnerusutut nassuiaatigaa.
- Sermitsiaq Nuummut qangarsuarli ilisarnaataajuaannarpoq – qaqqaq eqqissinermik, nukittunermik kinaassutsimillu inissaqartitsisoq. ‘Sermitsiap Qilaataa’-nik pinngortitap kulturillu naapiffiannik qaqqamut kalaallillu qilaataanut nersorinninnermik pilersitsinissaq kissaatigaara. Suliaq ammasumik isikkiveqarluni ammasuussaaq kajungernarlunilu, tassani innuttaasut tikeraallu kinguaariit, oqaatsit kulturillu assigiinngitsut ataatsimoorsinnaassapput. Eqqarsaatersuuteqarfiusinnaasoq, sammisaqarfiusinnaasoq ataatsimoorfiusinnaasorlu – qaqqatsinnit qilaatitsinnillu ataatsimoortinneqartoq.
Borgmesterip, Avaaraq Olsenip ilisarnaat Nuup ilisarnaataanut ersarissuutitsillunilu innuttaasut illoqarfiup kulturianik pinngortitaanillu misigisaqarfigisinnaassagaat aamma erseqqissaatigaa.
- Innuttaasut tusarnaarpagut. Nuuk2035-p suliarineqarnerani innuttaasut ersarissumik ilisarnaateqarnissaq kissaatigaat – ataatsimoorfik issittumi illoqarfiit pingaarnersaattut kinaassutsitsinnut takussutissaq. Taamaattumik unammisitsineq aallartipparput massakkullu ajugaasumik toqqaavugut.
Borgmesterip ernumassuteqarneq paasisinnaagaa
Suliniulli innuttaasut arlallit akornanni aamma isornartorsiorneqarpoq, taakkulu aningaasat eqqortumik pingaarnersiorneqarnersut apeqquserpaat. Uanilu aningaasat pingaarnerusunut soorlu illoqarfiup ilaani nungullartunik nutarterinissamut atorneqartariaqarnerarlutik. Tamatuma saniatigut inuit 271-iinnaat suliniummi taasisimatillugit ilisarnaammik ilumut sanasoqartariaqarnersoq aamma oqariartuutigineqarpoq. Borgmesterillu ernumassutigineqartut maluginiarneqartut erseqqissaatigaa.
- Peqatigitillugu kulturikkut oqaluttuarisaarnermi illut pillugit ernumassuteqarnerit paasisinnaavagut kisianni kommunimit pigineqanngimmata toqqaannartumik iliuuseqarsinnaanngilagut. Suleqatigiinnissamulli piareersimajuaannarpugut. Anguniagarput suli allanngunngilaq: Oqaluttuarisaanitsinnut ataqqinnilluta innuttaasunillu oqaloqateqarluni Nuup ineriartortinnissaa.
Kommunalbestyrelsip 5 millionit koruunit suliniummut 2024-mi missingersuutigai, suliniutillu piviusunngortinneqarnissaa Bilo Høegh Stigsen peqatigalugu suliaralugu ingerlateqqinniarlugu.
