Nuup ilisarnaatissaanut taasisut ikittuinnaasut

Kommuneqarfik Sermersuup Nuummi ilisarnaammik nutaamik ammasumik unammisitsinermini “illoqarfiit pingaarnersaannut sunniuteqassapput aamma innuttaasut tikeraallu tulluusimaarutissaqarnerannik pilersitseqataassapput” allappaa.

Innuttaasut tamatumunnga qiimmatsaqataannginnerat takuneqarsinnaavoq.

Suliniutit aalajangiunneqartut marluk akornanni taasititsinermi 200-t sinnilaarlugit taamaallaat maannamut taasipput, inoqatinulli attaveqaatini isornartorsiuisoqaleraluttuinnarpoq.

"Aningaasanik asuli atuineq "

Suliniummut 250.000 koruunit immikkoortinneqartut, pingaaruteqarnerusunut allanut atorneqartariaqaraluartut, Kommuneqarfik Sermersuup Facebookimi quppernerani oqaaseqaatit amerlanerpaartaanni isummersuutigineqarput.

Illoqarfiup atuarfii oqummik eqqugaasut nutarterneqarnissaannut, angerlarsimaffeqanngitsunut innuttaasunullu atugarliortunut ikiuutissatut, inissialiortiternissamut kiisalu inissianik aqqusinernillu nutarterinissamut atorneqarsinnaagaluartut ilaannit siunnersuutigineqarput.

Tamatumunnga ilanngullugu illoqarfiup ilisarnaatissaanut arlallit pitsaanerusumik siunnersuuteqarsinnaasoripput. Soormi Trumpitut imaluunniit J.D. Vancetut ilusilersukkamik?

Nuup Sermitsiaq ilisarnaatigereeraa, sooq ilisarnaatissaanut aningaasanik atuisoqassanersoq allat apeqqusiipput.  

Illoqarfimmi avatangiisinik takujuminartunik pilersitsineq

Kommuneqarfik Sermersoq naapertorlugu, eqqumiitsuliorneq kulturilu illoqarfimmi avatangiisit takujuminartuuneranut pingaaruteqartuupput, tamannalu unammisitsinermut tunngaviuvoq.

Taamaattumik innuttaasunut tikeraanullu ataatsimoorfiusinnaasumik kiisalu kalaallit kulturiannik Nuullu illoqarfinni anginersaaneranut paasissutissiisinnaasumik ilisarnaammik kissaateqartoqarpoq. 

- Illoqarfimmi illoqannginnersanik kikkut tamarmik tikilluaqqusaasutut misigisimaffigisaannik uninngaarfissanillu kajungernartunik, soorluttaaq assigiinngitsunik kulturillit kinguaariillu assigiinngitsut naapiffigisinnaasaannik pilersitserusuppugut. Ineriartornermi taamaattumi eqqumiitsuliorneq kulturilu pingaaruteqarluinnarput - inuunermut kusanassutsimullu tunniusseqataapput, oqaluttuassatsinnik saqqummiillutik aamma ataatsimooqatigiinnut nukittorsaataapput, kommunip unammisitsinermut takorluugaani taama allaqqavoq.

Illoqarfiup pingaarnersaa nutaaliaasoq

Nuummi innuttaasut kisimik suliniummut apeqqusiinngillat. Kommuneqarfik Sermersuumi illoqarfiit nunaqarfiillu allat ukkatarineqanngippallaarneri aamma isornartorsiutigineqarput.

Ilisarnaatissaq Nuummut inissinneqassappat, illoqarfiup “Kalaallit Nunaata qiterpiaattut atuuffeqarnera” pissutaavoq. Nunat tamalaat mittarfiat aamma imaanut toqqaannartumik atassuteqarneq, “illoqarfiup nunap sinnera nunarsuullu sinneranut atassuteqalersitsisuupput”, kommuni allappoq – aamma “tamanna pisussaaffiuvoq”. 

- Nuuk pissanganartumik ineriartorpoq aamma nunanit tamalaaneersunit amerliartuinnartunit najorneqalerpoq, taamannallu ineriartortoqarnera malunnartinneqassasoq uagut kissaatigaarput, anguniagaraarpullu tassaassalluta illoqarfiit pingaarnersaat nutaaliaasoq - eqqumiitsuliamik nutaamik ilisarnaateqartoq, kommuni allappoq.

Unammisitsineq septembarip aallaqqaataaniit novembarip aallaqqaataanut tamanut ammavoq. 

Siunnersuutit nassiunneqartut aalajangiinermi ataatsimiititaliamit kommunimi sulisuusunit aalajangiunneqareerput, tamanullu ammasumik taasissutigineqartussanngorlugit nassiunneqarput.

Aalajangiinermut sunniuteqaqataanissamut angumersiniaruit tuaviortariaqarputit. Kommuneqarfik Sermersuup nittartaagaatigut taasineq sapaatiuppat novembarip 23-anni unissaaq, kingunitsianngualu novembarip 26-anni nalunaarutigineqassalluni.