Akerliussutsimik takutitsisut allagartarsuit ’naammaleqaaq’-mik allassimasortallit siggartaatit torlulaartaatillu atorlugit Nuummi aqqusinertigut ingerlaarput. Akerliussutsimik takutitsisut tamangajammik ilisarnarluinnartunik tungujortunik sullisinik gumminillu takisuunik atugaqarput.

Qularutigineqarsinnaanngilaq. Akerliussutsimik takutitsisut aalisartuupput taakkulu ullumikkut nunamiiginnarlutik arlalinnut akerliussutsiminnik takutitsipput, taakkulu aalisarnermut inatsisissaq aamma nipisaat saarulliillu akikinneri akerliuffiginerpaavaat.

Akerlisussutsimik takutitsisut eqimattanngorlutik Inatsisartut tungaannut ingerlaaqatigiipput, taakkulu politikerit oqalunnissaat neriuutigaat. Assi © : Carsten Faurschou / KNR

"Pisuut pisuunngussapput, sinerissallu qanittuani aalisartut nungusagaapput", akerliussutsimik takutitsisut allagartarpassuini allassimavoq.

- Saarulliit akikinngaarmata ilaqutariippassuit inigisaminnit anisitaapput, akerliussutsimik takutitsisut ilaat ingerlaaqatigiinnerminni suaartarpoq, ilaallu qattanut anaaleraapput, suaartarput siggartaammillu nipiliorlutik.

Meeqqat kaapput uagullu nikanarsagaavugut

Akerliussutsimik takutitsisut tamatigut tamaana suaartartarput, qiimmassassimaarlutillu, tamannali aalisartut kamassimasut 25-t missaanniittut Royal Greenlandimut qanilliartorneranni allanngorpoq.

- Meeqqat Royal Greenland pisuulluni kaapput, angut torlulaartaatikkut oqarpoq.

Akerliussutsimik takutitsisut sinneri nipituumik qattanik plastikkiusunik anaalerillutik, siggartaatinik siggartartitsillutillu suaartarnerminnik isumaqatiginninnerminnik ersersippaat.

- Royal Greenland ajortisaarivoq. Nunatsinni akit sooq Islandimit 80 procentimik appasinneruppat, akerliussutsimik takutitsisut ilaat aperivoq.

'Naammaleqaaq' allagartarsuarni atuarneqarsinnaavoq, tamannalu akerliussutsimik takutitsisuni aamma erserpoq. Assi © : Carsten Faurschou / KNR

- Naammatsippunga. Aalisarnermut inatsisissaq ernumassutigaara akillu appasippallaarput, akerliussutsimik takutitsisuni inuunerit ilaat oqarpoq.

- Siunissaq takorlooruminaatsippara. Akit assersuutigigutsigit Royal Greenlandip isumaqatigiinniaqqaarani aalajangersuinnarsinnaavai. Uagullu ukiup tullissaani nikanarsagaaqqinnissatsinnut utaqqeqqiinnassaagut.

Akit siunissallu qularnarnera pillugu suaartarnerit akerliussutsimik takutitsisut tamarmik Jens K. Lyberthip allallu assatik kaallugit qeqqisimasut tungaannut suaartarnerannik nipiliornerannillu kinguneqartarpoq. Taakku iliuuseqanngillat akerliussutsimillu takutitsisut ingerlaqqilernerani iseqqipput.

‘Killuussisut tikippagut’

Angut torlortaatilik unippallaassanani nipiliuinnavippoq. Mikrofoni oqaatigisaminik nipitunerulersitsisut qanitsiinnavippaa taamaalilluni siggartarpaluttoqaannavilluni. Akerliussutsimik takutitsisut akornannit pujuallattaavoq. Arlallit cigaretiimik kimmiaqarlutik illoqarfikkut ingerlaarput.

Suaartarnerit nippakkiartorlutillu akulikilliartorput kamassimarpalunnerusumillu nipeqaleriartorlutik.

- Sinerissap qanittuani aalisartut inatsisitigut illersorneqassapput, tammartinneqaratik, akerliussutsimik takutitsisut arlallit amerliartortut suaartaatigisarpaat.

Akerliussutsimik takutitsisut siggartaataat biilit siggartarnerinik ilalerneqartarpoq, aalisartut eqimattat illoqarfiup qeqqanut qanilliartorneranni biilit siggartaataanik ilalerneqartarneri amerlaneruleriartorput. Matut igalaallu ammarneqarput inuillu aalisartunut tapersiillutik suaartaqataasarput. Illoqarfiup qeqqani eqimattat 50-it 60-illu akornanniittut Inatsisartut tungaannukartut amerliartorput.

Akerliussutsimik takutitsisut Inatsisartunut apuummata politikerit ilaat oqaaseqarput, ilaallu oqaaseqaratik. Assi © : Nicole Sander Bertelsen/ KNR

- Killuussisut tikippagut, akerliussutsimik takutitsisut qinikkat matuisa saannut apuummata akerliussutsimik takutitsisut ilaat suaarpoq.

Inuit 50-it 60-illu missaanniittut 100-t missaannik amerlassuseqalerput. Eqimattallu akulerussimasut maanna nunatsinni qinikkat saanniilerput.

Politikerit oqaatigisaat aalisartunit kamassimasunit assigiinngitsumik tiguneqarput. Assi © : Carsten Faurschou / KNR

Qinikkat tulleriiaallutik oqaaseqarput, akerliussutsimillu takutitsisut suaartarneranni aalisarnermut inatsisissaq akillu naammagisimaarneqanngitsut ersarilluarpoq. Angulli aalisarnermut inatsisissamut siuttuusoq Kim Kielsen (Siumut) oqaaseqanngilaq. Aamma Royal Greenland akerliussutsimik takutitsisut siusinnerusukkut allaffissuup saaniinnerani oqaaseqanngilaq.

- Aqutsisutulli akerliussutsimik takutitsinut anillanniarnata aalajangerparput, sulisugullu KNAPK-p isornartorsiutaanut akisussaasuunngillat, aalisakkerivissuaq sisamanngornermi ullaap tungaani tusagassiuutinut nalunaarummi oqarpoq.

Akerliussutsimik takutitsisut KNAPK-p allaffianit Royal Greenlandimut saarulliit nipisaallu akiinik naammagisimaarinninnginnerminnik takutitsiartornerannik aallartipput. Assi © : Carsten Faurschou / KNR