Tusagassiuutit: Danmarks Radio Nuummi ataavartumik allaffeqarfittaalertoq
Atorfinnik paarlaassuinermut atatillugu DR-imilu nunanut allanut tusagassiortut amerlilerneqarneritigut danskit tusagassiorfiat “Kalaallit Nunaanni najuunnertik ingerlateqqikkusuppaat”.
DR-ip nunanut allanut tusagassiortuata Niels Svalep suliaqaqatigiit atuagassiaannut Journalistenimut paasissutissiissutigaa.
- Kalaallit Nunaata naalagaaffeqatigiinnerullu tusagassiarinissaat qanoq soqutiginartigalunilu pingaaruteqartigisoq takusinnaasimavarput. Ineriartornermut malinnaajuarnerput najuuttuarnerpullu naleqquttuutipparput, Niels Svale tusagassiorfimmut taama oqarpoq.
Inatsisartunut qinersinerup aamma oqaluttuat allat Kalaallit Nunaanniit aamma Kalaallit Nunaat pillugu tusagassiarineqarnissaannut, DR-i ataavartumik Kalaallit Nunaanni Nuummi najugaqartussamik ilanngutassiortoqarnissartik, ukioq manna januarimi aalajangiuppaat.
- Danmarkimiinnaanngitsoq imaluunniit Washington D.C.-miinnaanngitsoq, Kalaallit Nunaat Kalaallit Nunaanniit piffissami taamaattumi aamma tusagassiarineqarnissaa tusagassiorfiup suliassatut paatsuugassaanngitsumik qulakkeertussaavaa, DR-imi nutaarsiassaqartitsiviani pisortaagallartunngortup Kirsten Marie Svendsen taamani oqarpoq.
Nunami maani susoqarnera pillugu tusagassiortuarnissaq DR-ip kissaatigaa. Erseqqissumik oqaatigalugu, tassa DR-i Nuummi ataavartumik allaffeqarfittaassaaq, tassani DR-imit tusagassiortut paarlakaajaallutik sulisinnaaniassammata, suliaqaqatigiit atuagassiaat allappoq.
DR-i tusagassiortunik qanoq akulikitsigisunik Kalaallit Nunaanukartitsisassanersoq, allaffeqarfillu qaqugu ammarneqassanersoq ilanngutassiami allaqqanngillat.
