Namminersortut nittartakkakkut suliffissarsiorfik nutaaq pillugu: Sooruna akileraartartut unammillertutsinnut akiliissasut?
- Ajuusaarnarpoq Namminersorlutik Oqartussat, uagut periarfissiinerput atornagu, innuttaasut aningaasaataat atorlugit nammineq pilersitsiniarmata.
- Soorunami ernumanartoqarpoq, pissutigalugu sinerissami akileraartartut akiligaannik uagut, privatimik ingerlasut unammillerneqassagutta. Aammalu eqqarsarnarluni equngasoqartoq tassuunartaatigut.
Nuiana Harden aamma Johannes Qvist-Markussen tamarmik nunatsinni sulisussarsiornermik suliffissanillu nittarsaassinermik suliaqartuusut taama oqarput.
Taakku naalakkersuisut suli.gl-itoqqap aamma maannakkut aaqqiissutaagallartup jobindex.gl-ip taartissaannik, pisortat namminneq pigisaminnik, nittartakkakkut suliffissarsiorfissarsiortarfissamik pilersaarutaat isornartorsiorpaat.
Taamaalillutik ilaatigut partiit Siumup, Naleqqap, Sulisitsisut aamma Tusagassiorfik Sermitsiap naalakkersuisut nittartakkakkut suliffissarsiorfittaarnissaanut sapaatit akunnerini kingullerni isornartorsiuinerannut ilanngupput.
Pisortat nittartakkatigut suliffissarsiorfiat sulisussarsiornermut suliffinnillu nittarsaassinermut suliffeqarfimmik suliffissat.gl-imik piginnittuusumut Johannes Qvist-Markussenimut sulianullu pingasunut aarlerinarsinnaavoq.
- Tassami soorunami sunniuteqaqataassaaq, taanna akeqanngitsumik suliffissarsiortarfik, sulisussarsiortarfik imaluunniit atorfinnik nivinngaasarfik atorneqalissappat. Soorunami uagutsinni aamma sipaarniarfigineqartariaqalissaaq ingerlanerput, taanna oqarpoq.
25-nik ukiulik Nuiana Hardenberg Københavnimi ilinniarnermi saniatigut nittartakkatigut suliffissarsiorfimmi Alfred Kalaallit Nunaannimi sulisarpoq. Taassuma pisortat nittartakkatigut suliffissarsiortarfeqalernissaat pissutigalugu pisortat suliffeqarfiinik atuisoqalernissamut ajornakusoortitsilernissaa uggoraa.
- Namminersorlutik Oqartussammi pilersaarutertik ingerlatiinnassagunikku assersuutigalugu pisortat suliffeqarfiinik uagutsinnik atuisoqarnavianngitsoq takusinnaavarput, taanna oqarpoq.
Tamatuma saniatigut akileraartartut aningaasaataannik atuilluni nittartakkatigut suliffissarsiorfimmik ineriartortitsinissap pingaarnersiorneqarnera eqqumiippoq, kalaallimmi nittartakkatigut suliffissarsiorfiannik taakkuninnga suliaqarsinnaasunik peqareerpoq.
- Taamaalillutik ineriartortitsinermut ingerlatsinermullu aningaasartuutinik aamma nunatsinni aningaasanik sipaaruteqarsinnaapput, taanna oqarpoq.
Danskit tusagassiorfii: Nittartakkatigut suliffissarsiorfik unitsinneqarli
Nittartakkatigut suliffissarsiortarfissaq tukattumik suliarineqareermat politikeri, Bentiaraq Ottosen (IA) Isumaginninnermut, Suliffeqarnermut, Nunamut Namminermut Avatangiisinullu Naalakkersuisutut tunuarpoq.
Tamannali naalakkersuisut pisortat nittartakkatigut suliffeqarfimmik pilersaarutinik unitsitsissutiginngilaat, Ottosenillu tunuarnerata kingorna Tusagassiorfik Sermitsiaq pisortat Sermitsiap suliffissanik saqqummersitsisarfianut unammillernera imminnut tusagassiornermullu qanoq kinguneqarsinnaanerat saqqummiuppaa.
Isornartorsiuineq kalaallit Tusagassiuinermi Peqatigiiffianit aamma Transparency Greenlandimit taperneqarpoq, Danskit Tusagassiorfiisa peqatigiiffiat tusagassiorfimmut tapersiinermik aamma nalunaaruteqarput.
- Kalaallit Nunaanni innuttaasut ikinnerat pissutigalugu niueqatigiinneq siooranarpoq, pisortat annertusaanerat sunaluunniit niuerutiginnittunik eqqorneqartussanik eqqarsaatiginninnissaq akuutitsinissarlu pisariaqarpoq, peqatigiiffik tusagassiuutinut nalunaarummi allappoq.
- Tamanna tunngavigalugu Danske Medierip Sermitsiap suaaruteqarnera taperserpaa aamma siunnersuutip tamat oqartussaaqataanerannut aarlerinartortaqarnerannik ilisimatusartut naliliinerat isumaqatigalugu. Taamaammat Danske Medierip suliniutip atulerseqqunngilaa, taakku taama allapput.
Nalinginnaasumik suliffinnik nittarsaassiviussava imaluunniit?
Naalakkersuisut Siulittaasuat, Jens-Frederik Nielsen (D) Sermitsiap isornartorsiuinerata kingorna eqqissisaalluni qisuariaateqarpoq.
Siulittaasup isornartorsiuineq KNR-imit apersorneqarnermini ingattarsereraanerarpaa, ernumanissamullu tunngavissaqannginnerarlugu, nittartakkatigummi suliffissarsiuk nalinginnaasuunnginnerarpaa.
- Nittartakkakkut suliffissarsiorfittut nalinginnaasuunnginnissaa anguniarlugu aaqqiissutissanik periarfissarpassuaqarpoq. Ilinniartut ilinniarnerminnut atatillugu suliffeqarfiit suut ilinniartunut suliffissaqartitsinersut ilinniartunit takuneqarsinnaalernissaa pingaarnerpaavoq, taanna oqarpoq.
Nittartakkatigullu suliffissarsiortarfimmut tunngatillugu ilinniartut suliffeqarfinnik ilinniarfissalinnik nassaarnissaannut ajornannginnerulersitsinissaq eqqarsaatigineqarneruvoq, paasissutissarlu tamanna suliffissat.gl-imit Johannes Qvist-Markussenimut nutaarsiassaavoq.
Siusinnerusumimi nalunaarutit taama oqariartuuteqarsimanngitsut taassuma oqaatigaa:
- Soorunami ilinniartuinnarnut eqqarsaatersuutigineqarsimaguni ajunngilluinnaqqissaarpoq, kisianni suliariumannittussarsiuunneqarmat taamatut nipeqarnikuunngisaannaavikkami, taavalu ingerlanerani aamma taamak nipeqarnikuunani, taanna oqarpoq.
- Nuiana Hardenbergip Afred Kalaallit Nunaanneersup naalakkersuisut qanoq aaqqiissuteqarumaarnerat pissanngagaa.
- Qanoq aaqqiissuteqarnissaa takunikuunnginnakku aamma pissanganarpoq, taanna oqarpoq.
Nittartakkatigut suliffissarsiorfik suli.gl-imut aamma jobindex.gl-imut taarsiissutaasussaanera imaluunniit ilinniarfissarsiortunut taamaallaat atugassaassanera apeqqutaatinnagu naalakkersuisut periarfissanik assigiinngitsunik nunatsinni pissarsiassaareersunik misissueqqaarsimasariaqaraluartut taanna isumaqarpoq.
- Aaqqiissummut taamaattumut aningaasat qanoq amerlatigisut igiinnarneqassanersut apeqquserneqarsinnaavoq. Aningaasat taama nioqquteqartunut atorneqarsinnaagaluarput, aamma pioreersunut tapiissutigineqarsinnaagaluarlutik, Nuiana Hardenberg oqarpoq.
