Aallaasersorluni toqutsisoqarnerata kingorna nunasiniat nunanit siuarsagassaneersut Trumpip nunasisinnaajunnaartinnialerai
USA-p præsidentiata Donald Trumpip nunasiniat nunanit siuarsagassaneersutut taasagaaneersut USA-mut nunasisinnaajunnaavinnissaat kissaatigigaa inoqatinut attaveqaqatigiittarfiutimini Truth Socialimi taama allappoq.
Sakkutuut marluk Nationalgardemeersut Washington D.C.-mi pingasunngormat aallaaneqareersullu præsidenti taama nalunaaruteqarpoq. Sakkutuut marluk aallaasersornermi ikilerneqarput, aappaa toquvoq aappaalu inuunerminik navianartorsiorpoq.
Angut Afganistanimiu 29-nik ukiulik allaasersortutut pasineqarpoq.
USA-p nunasinianut politikkia pissutaalluni Amerikamiorpassuarnut atugassarititat ajornerulersimasut, Trump isumaqarpoq.
- USA-mi nunanit siuarsagassaneersut nunasisinnaajunnaavitsinniarpakka, USA-mi periutsit pissusissamisut ingerlaqqilerniassammata, Donald Trump Truth Socialimi allappoq.
Nunasisimasut akuersissutaat allanngortinniarlugit sioorasaarisoq
Amerikamiusut innuttaassuseqanngitsut USA-p naalagaaffianit tapiissuteqarfigineqartarnerat unitsinniarlugit Præsidentip aamma oqaatigaa.
Joe Bidenip præsidentiunerata nalaani USA-mi nunasisimasut akuersissutaat millionilikkuutaat allanngortinniarlugit præsidentip aamma sioorasaarutigaa, nammineq oqarnera naapertorlugu kikkulluunniit ”USA-mut iluaqutaanngitsut” anisinniarlugit.
“Nunasiniat naalagaaffiup iluani eqqissisimanermik innarliiniat, naalagaaffimmi innuttaassusaannik aamma nunami allami innuttaassusillit tamaasa nunamit aallartinnissaat, pisortanut nanertuutaasut, isumannaallisaanermut aarlerinaatillit imaluunniit nunanut killernut peqateqarsinnaanngitsut arsaartornissaat” kissaatigalugu Trumpip aamma allappaa.
Joe Bidenip præsidentiunerata nalaani inuit tuusintilikkuutaat tunuliaqutaat misissorluaqqaarnagit USA-mi nunasisinnaasimasut Trumpip naalakkersuisoqataasalu oqaatigaat.
USA nunamit 2021-mi tunuarnerani, Afghanistanimiit timmisartut inunnik angallassisut assingi tamanut saqqummiutiutigalugit, Truth Socialimi allamik allagaqarluni oqaatigisani tallimanngornermi uteqqippaa.
Inuit kukkusut timmisartumiissimasut, USA-mullu sumilluunniit nakkutilliinermik inuttulluunniit tunuliaqutaat misissorneqaqqaarnatik isersimasut, Trump isumaqarpoq.
Angut Afghanistanimioq 29-nik ukiulik Washington D.C-mi pingasunngornermi aallaasersorsimassangatinneqartoq, USA-mi oqartussat isumaqarput. Taassuma Amerikamiunut Afghanistanimi sorsunnerini ikiuuppoq, nunamiillu 2021-mi tunuarnerini USA-mut iserluni.
/ritzau/
