Arnat 1991-ip tungaanut arnat spiralerneqarsimasut taarsiiffigineqassanerlutik imalluunniit taarsiiffigineqassannginnerlutik erseqqissaavigineqarnissaminnut utaqqisariaqarnerannut, suliani nutaanerusuni eqqugaasunut allatorluinnaq ippoq.

Siumumi aamma Inuit Ataqatigiinni Naalakkersuisuusimasut 4,5 millionikoruuninik immikkoortitsinissamut siorna isumaqatigiissuteqarput, 1992-ip kingorna spiralilerneqarsimasunut taarsiissutissanut atugassaallutik – ukioq taanna peqqinnissaqarfik nunatsinnit akisussaaffigineqalerneraniit. 

Eqqugaasullu qaammatip ataatsip missaa qaangiuppat taarsiiffigineqarnissamut qinnuteqarsinnaanngussapput.

Tamanna nittartakkakkut sullissivik.gl aqqutigalugu qinnutigineqarsinnaassasoq, Inuussutissanut, Aatsitassanut, Nukissiuutinut, Inatsiseqarnermut Naligiissitaanermullu Naalakkersuisoq Naaja Nathanielsen (IA) oqarpoq.

1992-ip kingorna arnat piumassuserinngisaminnik spiralilerneqarsimasut taarsiiffigineqarnissamut qinnuteqarsinnaanngornissaat, Naaja Nathanielsen (IA) spiralilersuisimaneq pillugu suliani naalakkersusisunit oqaaseqartartuusimasoq qilanaarpoq.  Assi © : KNR / Markus Valentin

- Eqqartuussissuserisut suliffeqarfiat peqatigalugu isumaqatigiissusioqqammerpugut. Naalakkersuisut naliliisassanngillat. Suleqatigiinnik inatsisilerinermut tunngasunik aamma peqqinnissamik sulialinnik immikkut ilisimasalinnik, suliamullu tunngatillugu allat atorfissaqartinneqarsinnaasut ilanngullugit peqarnissaa isumagissavarput, taanna oqarpoq nangillunilu: 

- Kiisami ingerlariaqissinnaanngorpugut, tamatumalu saqqummiunnissaanut qilanaarpunga, taanna oqarpoq.

Taarsiiffigineqarnissamut qinnuteqarfissaq ukiup aallartinnerani piareertussaanikuugaluarpoq, Inatsisartunulli qinersisoqarnerata suliaq unikaallatsippaa.

- Nutaanittaaq Naalakkersuisoqalertussaammat suliaq kinguarsarneqarpoq, qaammatilli ataatsip iluani qinnuteqarfissaq piareerneqassaaq, Naaja Nathanielsen oqarpoq.

Paasissutissat qanoq, sumi kinalu taarsiiffigineqarnissaq pillugu qinnuteqarsinnanersut paasissutissiissutigineruneqarumaarput.

- Soorunami tamanna pitinnagu peqqissaarussamik paasissutissanik suliaqassaagut, qanoq sumilu qinnuteqartoqarsinnaaneranik nassuiaalluta, taanna oqarpoq.