Peqqissutsimut innarluutilinnullu naalakkersuisoq Anna Wangenheim (D) aamma Danmarkimi nunami namminermut peqqissutsimullu ministeri Sophie Løhde, Nuummi tusagassiortunik sisamanngornermi katersortitsipput.

Peqqinnissaqarfimmi katsorsaasarnerup pitsanngorsarnissaanut isumaqatigiissut tassani atsioqatigiissutigaat. 

Atsiortoqatigiittoqannginneranili tusagassiortunik katersuutitsineq pivoq, tassanilu tusagassiortut apeqquteqarsinnaapput.

Arnat spiralilersuinermit eqqugaasut danskit naalagaaffiannit aningaasanik qanoq annertutigisumik taarsiiffigineqarnissartik naatsorsuutigisinnaaneraat, Sermitsiami tusagassiortup tassani apeqqutigaa.

Sophie Løhdemmi arnat spiralilersuinermit eqqugaasut ilai, Nuummiinnermini sapaatip akunnerani matumani oqaloqatigisimavai. Tassani saammaasseqatigiinnissamut aningaasaateqarfik, arnanut eqqugaasunut ataasiakkaanut aningaasatigut taarsiissuteqarnissamik periarfissiisussaq, aappaagu atuutilissasoq, peqqissutsimut ministerip pingasunngornermi nalunaarutigaa.

Pilersaarut malillugu aappaagu ukiup affaata naanerani aningaasat tunniunneqassapput, Sophie Løhde oqarpoq.

Taarsiissutigineqartussarli qanoq annertutigissanersoq aalajangerneqartinnagu inatsisitigut aaqqissuussineq naammassineqaqqaartariaqartoq aningaasaateqarfillu pilersinneqaqqaartariaqartoq, Sophie Løhde Sermitsiap apeqqutaanut akivoq.

- Periusissaq inatsisitigut tunngavissaliinikkut maanna inississavarput. Taamaattumik Kalaallit Nunaannut angalanissara kalaallininngaanniillu siunnersorneqarnissara uannut pingaaruteqarsimavoq, Sophie Løhde oqarpoq.

Arnat 300.000 koruuninit ikinnerusunik taarsiiffigineqarnissartik akueriinnarnavianngikkaat, arnat spiralilersuinermit eqqugaasut oqaaseqartartuat, Naja Lyberth KNR-imut oqarnikuuvoq. Arnallu 143-t, akuersitinneqaqqaarnatik spiralilersugaasimasut, danskit naalagaaffiat taamatut piumasaqarfigalugu eqqartuussivimmut tunniunnikuuaat. 

Qallunaat kalaallillu peqqinnissaqarfiisa akornanni isumaqatigiissut, kalaallinut uninngasunut katsorsaanissamut periarfissanik pitsanngorsaasussaq nunatsinnilu peqqinnissaqarfimmi sulisoqarnerup patajaatsuunerunissaanik qulakkeerisussaq, tusagassiortunik ippassaq katersortitsinermi sammineqarpoq. Assi © : KNR, Carsten Christensen

Arnat ataasiakkaat saammaasseqatigiinnissamut aningaasaateqarfik aqqutigalugu taarsiiffigitinnissaminnik qinnuteqarniartut Danmarkip qanoq annertutigisumik taarsiivigissanerai, Løhdep tusagassiortunik katersortitsinermi oqaatigisinnaanngilaa.

Aningaasat pillugit sukumiinerusumik oqaaseqarsinnaanngilatit?  Sermitsiami tusagassiortoq apereqqippoq.

- Tamanna inisseqqaartariaqarparput, pingaaruteqartorli tassaavoq sukumiisumik maanna piffissaliisimanerput, Sophie Løhde akivoq.