Perorsaasut: - Politikerit eqqartuussivilersuunnialerpagut
Danmarkimi DR-ip nutaarsiassat ilaattut ullumi tusarliuppaa, nunatsinni perorsaasut peqatigiiffiata PIP-ip ukiorpassuarni meeqqat sumiginnarneqarnerat nunatsinni politikerinit soqutigineqanngittuarnera massuaatigiuaraluaraa suli soqutigineqanngittuarsinnartoq.
- Aap, perorsaasut tamanna qatsulluinnarpaat, maannalu sukannersumik iliuuseqarnialersaalersut DR-ip tusarliuppaa. Perorsaasut eqqartuussivikkoortitsillutik suliassiissuteqarnialersaalerput, siullertullu Nanortalimmi pisoq eqqartuussivimmut suliassanngortinnialerlugu.
- Nanortallip kommunia kommuninut meeqqanut sumiginnaanerpaanut akuuvoq, PIP-imi siulittaasup tullia Sten Pedersen DR-imut taama oqarpoq.
Taanna assersuuteqarpoq, Nanortalimmi meeqqat ilaat imminornissamut siorasaarisimagaluartoq kimilluunniit iliuuseqarfigineqarsimanngitsoq.
Nangillunilu meeqqat kinguaassiutitigut atornerlunneqartuarnerat eqqartorpaa, tamanna nunatsinni oqaluuserineqarnaveersaakkatut isigineqartoq unnerlugu. Nuummilu meeqqat 100-kkuutaat unnuami paarineqaratik aneertuarnerat taakkartorluguttaaq.
- Meeqqat atuareeraangamik angerlarnaveersaartarput, angerlaraluarunik kinguaassiutitigut atornerlunneqanngikkunik ernguttunut angerlassagamik, taamaammat sumi tamaani unnuarsuarmut angalaartarput, inupiluusilersarlutillu, Sten Pedersen DR-ip radioanut taama oqarpoq.
Sten Pedersen DR-ip tusagassiortuanit aperineqarpoq, ajornartorsiummut taama angitigisumut eqqartuussivilersuussiniarnerat qanoq iluaqutaassanersoq.
- Misiliummik eqqartuussivilersuussiniarpugut taamaaliornitsigut inuiaqatigiinni pissutsit nukingisaarsinnaaniassagatsigit, taamaalillunilu aamma Namminersornerullutik oqartussat nukingisaarneqalissaaq. Tassami taannaavoq oqartuartoq meeqqanik sumiginnaanerit kommunit akisussaaffigigaat, uagulli oqarpugut inuiaqatigiit Namminersornerullutillu oqartussat akisussaaffigigaat, Sten Pedersen DR-imut taama oqarpoq.
