Perorsaasussaaleqineq ilungersunarpoq toqqissisimanaranilu
Politikerit iliuuseqartariaqarput, pissutsimmi maanna atuuttut toqqissisimananngillat, ineriartortoqarsinnaanngilarlu. Meeqqeriviit ilaani aqutsisoq taama oqarpoq.
Nunatsinni perorsaasussaaleqisoqartoq siorna ukiakkut ilaatigut saqqummiunneqarpoq.
Meeqqanut Atuarfeqarnermullu Kommuneqarfik Sermersuumi ataatsimiititaliami ilaasortanut tamanna pingasunngormat aammaarluni ilisimatitsissutigineqarpoq.
Kommune Kujalleq - 26
Kommuneqarfik Sermersooq - 49
Qeqqata Kommunia - 32
Kommune Qeqertalik - 17
Avannaata Kommunia - 8
Katillugit - 132
Najoqqutarisaq: Nunatsinni Perorsaasut Kattuffiat, NPK
Naammattunik perorsaasussaqarneq ajornertik akuttunngitsumik misigisarlugu, kommunip Nuummi meeqqeriviisa ilaanni Apissimi pisortap Jesper Andersenip oqaatigaa:
AAMMA ATUARUK Qaqortumi perorsaasussaaleqineq pillugu akerliussutsimik takutitsisut
- Sulisussarsioraangatta ikittuinnarnik qinnuteqartoqartarpoq, ilaatigullumi qinnuteqartoqarneq ajorluni, Nuummi meeqqerivimmi Apissimi pisortaq Jesper Andersen oqarpoq.
Perorsaasutut ilinniarsimasut ilinniarsimanngitsullu amigaatigineqarput. Meeqqerivimmut tamanna ajornartorsiutaalersinnaavoq, Jesper Andersen oqarpoq:
- Maani sulisut sulerulutsinneqalertarput, ulluinnarnilu stressilersarlutik. Isumannaallisaaneq uagut soorunami isumagisarparput. Sulisulli perorsaasutut ineriartorsinnaassusiat nukissaqarfiginngikkipput nassuerutigisariaqarparput. Meeqqat inissiinnarneqarsimasutut ipput, iluamik paarineqaratik, meeqqeriviup pisortaa oqarpoq.
AAMMA ATUARUK Perorsaasussaaleqineq sanngiinnernik eqquivoq
Meeqqat immikkut ikiortariaqartut taamaasillutik isumagineqarsinnaanngillat, meeqqalluunniit oqaatsitigut pikkorissarneqarsinnaanngillat, aalanerulernissaallu isumagineqarsinnaanani:
- Meeqqanik perorsaaneq nuannaralugu aallutarigatsigu maani sulivigut. Meeqqat immikkut ikiortariaqartut pillugit maani sulivigut. Meeqqat inuttut ineriartornissaat soorunami soqutigisaraarput, perorsaasussanilli taama amigaateqartigitillugu taamaaliorsinnaanngilagut, Nuummi meeqqeriviup Apissip pisortaa Jesper Andersen oqarpoq.
AAMMA ATUARUK Pædagogmangel er landsdækkende problem
Sulisullu toqqissisimanermik angajoqqaanut tunniussisinnaanerat killeqalersarpoq, Jesper Andersen oqarpoq:
- Toqqissisimannginneq meeqqanut soorunami aamma malunniutilersarpoq, akerleriinnerillu ullup ingerlanerani taamaalinikkut nalinginnaasumit amerlanerulersarlutik, Jesper Andersen naggasiivoq.
Kisitsisit Perorsaasut Ilinniarsimasut Peqatigiiffianneersut takutippaat kommunit tallimat perorsaasunik 132-nik ukioq manna marsimi amigaateqartut.
AAMMA ATUARUK Perorsaasunik tikisitsisariaqarpugut
