Perorsaasussaaleqineq sanngiinnernik eqquivoq
- Amigaateqarnerit assigiinngitsuni inissisimaffinni amigaataajuarnerat ernumassutigiuartarparput, Line Dalentoft, perorsaasoq ukiunilu kingullerni Peqqinnermut, Pitsaaliunermut aamma Sunngiffimmut immikkoortortaqarfimmi soraarninngornissami tungaanut pisortaaasoq, oqarpoq.
AAMMA ATUARUK Nuna tamakkerlugu perorsaasussaaleqisoqarpoq
Meeraaqqerivinni meeqqerivinnilu atorfiit 100-jut missaanniittut massakkut inuttaqanngillat. Perorsaasussaaleqinermi kingunerusinnaasut ilagaat, meeqqat sanngiitsut annermik eqqugaasinnaanerat.
- Killiffimmigut suli nukangasumik inissisimasimappat qanoq ilillugu taperserneqarnerunissaa pinngitsoorsimappat suli pisariaqartitaq annertunerusoq pilertarami, Line Daneltoft oqarpoq.
AAMMA ATUARUK Perorsaasussaaleqineq meeqqanut eqquinerluttoq
Ilinniagaqanngitsoorneq kigunerineqarsinnaasoq
Meeqqat meeqqat atuarfianni artorsarsinnaanerat siunissamilu ilinniagaqanngitsoorsinnaanerat perorsaasussaaleqinerup aamma kingunerisinnaavaa.
- Annertoorujussuarnik inuttut pisariaqartitanik killiffeqartoortarpoq ingerlanneqanngitsoortunik, Line Daneltoft oqarpoq.
Karen Wistoft, Aarhus Universitetimi perorsaaneq ilinniartitsinerlu pillugit ilisimatusarfimmi professori assinganik nalunaaruteqarpoq.
- Meeqqat siunissami ungasinnermi annaasinnaavagut. Taamaammat meeqqat ineriartornerisa ikorfartornissaannut sinaakkusersuilluarnissaq pisariaqarluinnarpoq.
Perorsaasussaaleqinerulli perorsaanermut tunngasunik sinaakkusiorluarsinnaaneq ajornakusoortinnerulerpaa, annermik meeqqanut ajornartorsioqqajaasunut.
AAMMA ATUARUK Perorsaasunik tikisitsisariaqarpugut
Tikisitsinissaq nuannaarutigaa
Taamaammat Line Dalentoftip avataaniit, assersuutigalugu Danmarkimiit perorsaasussanik Kommuneqarfik Sermersuup tikisitsinissamik pilersaarnera nuannaarutigaa.
- Apeqqutaanngilarmi kalaallisut qallunaatulluunniit oqaaseqartuulluni perorsaasuuneq, pingaarnerpaavoq meeqqap pisariaqartitaanik ilaqutariillu pisariaqartitaanik takunnissinnaasunik ilinniarsimasunik sulisoqarneq, Line Daneltoft oqarpoq.
