Nivi Olsen: Perorsaasunik tikisitsisariaqarpugut
Taamaasiornerlu Meeqqanut Atuarfeqarnermullu Ataatsimiititaliami siulittaasup periarfissatut kingullertut aaqqiissutaasussaasoraa.
- Periarfissat tamaasa misissoreerlugit allamik toqqangassaqanngilagut kingullerpaarpaaq iliuusissaq taanna allaminngaanniik tikisitsinissaq qiviartariaqalerparput, Kommuneqarfik Sermersuumi Meeqqanut Atuarfeqarnermullu Ataatsimiititaliami siulittaasoq Nivi Olsen oqarpoq.
Ilinniarsimanngitsut pikkorissarnerisigut ilinniarsimasunillu atorfiit inuttaqanngitsut pilerinarsarniarneqarsimagaluartut kommunip oqaatigaa.
Soorlu atorfimmut atatillugu inissaqartitsinikkut. Tamannali perorsaasussaaleqinermut iluaqutaasimanngilaq.
- Misissuisaqattaareerluta periarfissanik paasinarsivoq allanik toqqangassaaruttugut, Nivi Olsen oqarpoq.
AAMMA ATUARUK Pædagogmangel er et stort problem i Kommuneqarfik Sermersooq
Suleriuseq naammaginanngilaq
Kommuneqarfik Sermersuup maannakkut perorsaasut 52-it amigaatigai, ukiumulli 20-t missiliukannerlugit perorsaasunngortarput. Pisariaqartinneqartuniilli naammassisartut ikinnerujussuullutik.
Sulisussaaleqinerullu kinguneranik paaqqinnittarfinni suleriuseq naammaginanngitsoq Kommuneqarfik Sermersuumi atuarfeqarnermut ulluuneranilu paaqqinnittarfinnut immikkoortortaqarfimmi pisortap oqaatigaa.
- Meeqqerivitsialak anguniarneqassasoq politikkikkut suliniutaagaluarpoq, perorsaasussaaleqinerli taama annertutigitillugu anguniagaq naammattumik angujuminaappoq, Jesper Madsen oqarpoq.
AAMMA ATUARUK Qaqortumi perorsaasunngorniarfiup matuinnarnissaa isumaliutigineqartoq
Aningaasarsiat apeqqutaanngillat
Perorsaasunngorlaanillu Kommuneqarfik Sermersooq pissarsiorniarpoq. Soorlu Danmarkimit.
- Taamaattumik iliuuseqannginnerminngaanniik pitsaanerusorivarput nunap avataanut qiviarsinnaanissarput atorfissaqartitagut taakkua perorsaasut maani pigilerniassagatsigit, Nivi Olsen oqarpoq.
Perorsaasunngorlaallu aningaasarsiat pillugit nunatsinnut nuunnavianngillat, tamaattoqarneralu kommunalbestyrelsimit iliuuseqarfigineqarsinnaanngilaq.
- Ajornartorsiutigaarput kommuniminngaanniik toqqaannaq aningaasarsiat qaffannissaannut iliuuseqarsinnaannginnatta, Nivi Olsen oqarpoq.
