Isumaqatigiissut: Peqqinnissaq pillugu kattuffiit Namminersorlutik Oqartussat iliuuseqaqquaat
Peqqinnissaq pillugu kattuffiit siulittaasuata namminersorlutik oqartussat isornartorsiorpai.
- Dronning Ingridip Napparsimavissuani uninngasunut siniffiit ilaat aasaanerani atorunnaarsikkallartariaqaraat ilisimavara. Sulisunik amigaateqarneranut tamanna ersiutaaginnarpoq, Peqqinnissaq pillugu kattuffiit, PPK-p, siulittaasuat, Ken Jensen oqarpoq.
AAMMA ATUARUK Dronning Ingridip Napparsimmavissua sulisussaalatsivoq
AAMMA ATUARUK Peqqinnissaqarfiup ukkanneqarnerulernissaa Peqqinnissaqarfimmi sulisut ujartoraat
PPK-p Peqqissaasut, peqqissaasunut ikiortit, ernisussiortunit pillorissaasut allallu peqqinnissaqarfiup iluani sulisut sullippai.
PPK Namminersorlutik Oqartussanik sullitaminut ukiup aappaa affaq kingusinartoqareerluni decembarimi isumaqatigiissuteqarpoq.
Isumaqatigiissulli maanna qaammatit arfineq-marluk qaangiutereersut suli allaqqissaarneqanngilaq.
PPK-lu naapertorlugu tamanna peqqinnissaqarfimmi kommuninilu sulisussarsiornissamut ajornakusoortitsivoq.
AAMMA ATUARUK Lægeforeningen efterlyser penge til sundhedsvæsnet
Atorfillillu amigaatigineqarpata, tamanna atorfeqareersunut sulerulutsitsisartoq, Ken Jensen oqarpoq. Aamma kattuffik naapertorlugu paarlattaasut akisuut Peqqinnissaqarfimmi amerlerujussuarsimapput.
- Naammaginanngilaq, inuiaqatigiinnullu kingunerisinnaasai isigissagutsigit akisoorujussuuvoq, sulisussanik amigaateqarnitsigut aningaasarpassuarnik atuivugut, Ken Jensen oqarpoq, nangillunilu:
- Aningaasat taakkua ilaasortatta aningaasarsiaasa pitsanngorsarnissaannut atortikkusunneruagut, maani sulerusuttut suliinnarnissaannut taavalu aamma atugassarissaarnissaannut neqeroorsinnaanerussagatta, Ken Jensen oqarpoq.
Aningaasaqarnermut naalakkersuisoq, Pele Broberg, isumaqatigiissutinut akisussaavoq. Maannalu iliuuseqarnialerluni KNR-imut oqarpoq.
- Qanorpiaq susoqassanersoq massakkut taasinnaanngilara. Kisianni qularineqartariaqanngilaq iliuuseqalertugut. Taannalu uagut ilutsinni suliassaavoq, Pele Broberg, oqarpoq.