Peqqinnissaqarfiup ukkanneqarnerulernissaa Peqqinnissaqarfimmi sulisut ujartoraat
Nunatsinni peqqinnissaqarfik ilungersorfioreerpoq ukiunilu aggersuni ajornerulissasoq Nunatsinni peqqinnissaqarfimmiut ataatsimoorlutik oqaatigaat.
Nunatsinni peqqissaasoqarfik pillugu qineqqusaarnermi oqallisaasariaqaraluartoq, peqqissaasoqarfimmi sulisut kattuffianniit isumaqarfigineqarpoq.
- Peqqinnissaqarfimmut aningaasaliissuteeqqat qanoq tulleriiaarneqarnissaat pillugu oqallittoqartariaqaraluarpoq, Nunatsinni Peqqinnissaq pillugu Kattuffimmi siulittaasoq Ken Jensen oqarpoq.
AAMMA ATUARUK Peqqinnissaqarfik Nuummiunik ataatsimiigiaqqusivoq
Matumani meeqqanik ikkatilliisarnerit, meeqqat tutsarluttut, meeqqallu sukkortut peqqinnissaqarfimmi tulleriiaarinermit ukkanneqarnerulertariaqartutut assersuutigalugit.
- Nunatsinni peqqinnissaqarfiup ullutsinni ajornartorsiornera, ukiunilu aggersuni sulisunut piumasaqaatit suli sukanganerulertussaasut pissutsit pillugit kikkut tamarmik ilisimasariaqaraluarpaat. Taamaammat ajornartorsiutit taakku qanoq aningorsinnaanerivut pillugit oqallittoqartariaqaraluarpoq, innuttaasummi peqqinnerulersinnissaa tulleriiaarinermi anguneqarsinnaasuuppat tamatsinnut iluaqutaassagaluaqigami, Ken Jensen allappoq.
AAMMA ATUARUK Utoqqarnut, peqqinnissamut politiinullu aningaasat amerlanerit atorneqartussat
Peqqinnissaq pillugu Kattuffimmi siulittaasup peqqissaavinni sulinermi atugassarititaasut assersuutigai, ilaatigut isumaqatigiissutit piffissaq eqqorlugu inissinneqartartuugunik ukiunillu marlunnik kinguartoorfiunatik pisinnaasuugunik ajornartorsiutinik qaangiiniarnermi sakkussatsialaagaluartut Ken Jensenip assersuutigalugit.