Dronning Ingridip Napparsimmavissua sulisussaalatsivoq

Nunatsinni peqqissaasut ilinniarsimasut amerlanngillat, peqqinnissaqarfimmullu avataaniit sulisussarsiorneq ajornakusoorluni. Taamaammat Dronning Ingridip Napparsimmavissuani juunimiit aggustip qiteqqunneranut innangavissanik ikilisaavoq.

Tusagassiutinut nalunaarummi Namminersorlutik Oqartussat allapput immikkoortortani sulisut naliginnaasumik sullissinertik sapinngisartik tamaat eqqugaatinnaveersaartinniaraat.

- Ulapaarfimmili pinartunik nakorsiaqartillugu ilaat Islandimut Danmarkimulluunniit ingerlateqqinneqartariaqartassapput. Aamma suliaritittussat sivisunerusumik utaqqisarnissaannik kinguneqaratarsinnaavoq, nalunaarummi taama allapput.

AAMMA ATUARUK Peqqinnissaq pillugu kattuffiit Namminersorlutik Oqartussat iliuuseqaqquaat

Napparsimaviup immikkoortortat ilaannut peqqissaasunik pissarsinissaq ajornakusoortissimavaa.

- Sapinngisarput tamaat immikkoortortanut sulisussanik pissarsiniaraluarpugut, iluatsinngitsumilli, pilattaasarfimmi nakorsaaneq Knud Erik Kleist oqarpoq.

Aqutsisoqarfimmi pisortaq: Ilinniarsimasut ikippallaarput.

Nakorsaanerup naliginnaanerarpaa aasaanerani suliassanik ikilisaasarneq, aasaq mannali sulisussarsiorneq ajornakusoornerusimanerarpaa.

Aqutsisoqarfiup pisortaa Malene Marie Nielsen ilisimatitsivoq, peqqissaasut ilinniarsimasut suliap kivinnissaanut ikippallaarujussuartut.

- Pisup takutiinnarpaa qangali nalunngeriigarput: Maani ilinniarsimasut ikippallaarput, avataaniillu Kalaallit Nunaannut peqqinnissaqarfimmullu sulinissaminnik soqutiginnittut ikippallaarlutik, aqutsisoqarfimmi pisortaq Malene Marie Nielsen oqarpoq.

Peqqinnissaqarfimmi atorfiit assigiinngitsut kattussorfiisa siulittaasuata namminersorlutik oqartussat isornartorsiorpai akissarsiatigut atorfimmilu atukkat pillugit ersernerluttoqarmat.

Tamannalu kattuffiup tungaanit sulisussarsiornerup ajornakusoorneruneranut pissutaaqataatinneqarpoq.