Parnaarussaaqqanermi toqusoqarnera ilaqutaasut naammagittaalliuutigigaat
Marlunngornermi juunip 13-iani 2017 naqqinneqarpoq:
Tunumiumut 55-inik ukiulimmut Barselaj Ertamut qanigisaasut taama isumaqarput. Taanna kræfterluni Tasiilap napparsimmaviani januaarimi toqunissami tungaanut pinerluuteqarsimasunut inissiisarfimmi Herstedvester Fængselimi ukiuni 17-ini parnaarussaaqqavoq.
Kristeligt Dagblad tamanna pillugu arlalinnik allaaserisaqarpoq.
Barselaj Ertap toqunnginnermini misiligummik iperagaanissaanik noqqaassuteqarnerup Nunatsinni eqqartuussiveqarfimmit suliarineqanngitsoornera ilaqutaasut naammagittaalliuutigaat. Eqqartuussinissaq pineqartup toqunissaa qaammatinik marlunnik sioqqutilaarlugu taamaatiinnarneqarpoq, sunali pissutaanersoq ilisimatitsissutigineqarani.
Suliaq Nunatsinni eqqartuussiveqarnermut siunnersuisooqatigiinnut ilaqutaasut maanna suliassanngortinnialerpaat, KNR-imut taama ilisimatitsipput.
AAMMA ATUARUK Eqqartuussisoqarfiit kattunneqartariaqarput
Pinerluttunik Isumaginnittoqarfiup pisortaa, Naaja Nathanielsen, aviisimut Kristeligt Dagbladimut ima oqarpoq:
- Barselaj Ertaq sapinngisarput tamaat ikiorniarsarigaluarparput, aamma napparsimasupilussuummat katsorsarneqarnera Tunumullu angerlartinnissaa ataqatigiissaarniarlugit annertuupilussuarmik sulissutigineqarpoq.
AAMMA ATUARUK Danmark akisussaasuuvoq
Allaaserisatsinni siullermi oqaatigigaluarparput Barselaj Ertaq Danmarkimi Bispebjerg Hospitalimi toqusoq. Tamannali eqqunngilaq. Tasiilap napparsimmaviani toquvoq. KNR-ip kukkunini ajuusaarutigaa.