Parnaarussaaqqanermi toqusoqarnera ilaqutaasut naammagittaalliuutigigaat

Sakkortuumik pinerluuteqarsimasutut pineqaatissinneqarsimasut, ajorunnaarsinnaanatik napparsimalernerminni piffissaq kingulleq parnaarussiviup avataani atorsinnaasariaqarpaat.

Marlunngornermi juunip 13-iani 2017 naqqinneqarpoq: 

Tunumiumut 55-inik ukiulimmut Barselaj Ertamut qanigisaasut taama isumaqarput. Taanna kræfterluni Tasiilap napparsimmaviani januaarimi toqunissami tungaanut pinerluuteqarsimasunut inissiisarfimmi Herstedvester Fængselimi ukiuni 17-ini parnaarussaaqqavoq.

Kristeligt Dagblad tamanna pillugu arlalinnik allaaserisaqarpoq.

Barselaj Ertap toqunnginnermini misiligummik iperagaanissaanik noqqaassuteqarnerup Nunatsinni eqqartuussiveqarfimmit suliarineqanngitsoornera ilaqutaasut naammagittaalliuutigaat. Eqqartuussinissaq pineqartup toqunissaa qaammatinik marlunnik sioqqutilaarlugu taamaatiinnarneqarpoq, sunali pissutaanersoq ilisimatitsissutigineqarani.

Suliaq Nunatsinni eqqartuussiveqarnermut siunnersuisooqatigiinnut ilaqutaasut maanna suliassanngortinnialerpaat, KNR-imut taama ilisimatitsipput.

Pinerluttunik Isumaginnittoqarfiup pisortaa, Naaja Nathanielsen, aviisimut Kristeligt Dagbladimut ima oqarpoq:

- Barselaj Ertaq sapinngisarput tamaat ikiorniarsarigaluarparput, aamma napparsimasupilussuummat katsorsarneqarnera Tunumullu angerlartinnissaa ataqatigiissaarniarlugit annertuupilussuarmik sulissutigineqarpoq.

Allaaserisatsinni siullermi oqaatigigaluarparput Barselaj Ertaq Danmarkimi Bispebjerg Hospitalimi toqusoq. Tamannali eqqunngilaq. Tasiilap napparsimmaviani toquvoq. KNR-ip kukkunini ajuusaarutigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat