Angut toqutsisimasutut eqqartuunneqalersoq
Angut 2024-mi oktobarip aallartinnerani niaqqumigut 'arlaleriarluni' anaalerneqarami qaratsamigut aanaartoorpoq toqullunilu.
Politiit toqutsisoqarsimaneranik tunngatillugu suliami, Eqqartuussisoqarfik Sermersuumi ulluni tulliuttuni suliarineqartussami, taama pisoqarsimanerarpaat. Eqqartuussineq ullumi nalunaaqutaq qulingiluanut aallartippoq.
Tamanna unnerluussummi marlunnik immikkoortortalimmit erserpoq.
Toqutsineq unnerluussissummi allaqqasut naapertorlugit 2024-mi oktobarip aappaata sisamaatalu akornanni pivoq, toqutsinerli ullup qanoq ilinerani pisimanersoq ilisimaneqanngilaq.
Unnerluussisussaatitaasut Nuummi blok 5-imi 2024-mi toqutsineq pineqarnera, KNR-imut uppernarsarpaat.
Pisimasoq tusatsiakkanik siammarteriffiusoq. Tusatsiakkat ilaat tassaavoq, inupiluit pinerlunnermut attuumassuteqartut. Tusatsiagarli Kalaallit Nunaanni politiit pisortaata, Bjørn Tegner Bayip KNR pisup kingorna oqaluummagu, ilumuunnginnerapallappaa.
– Suliamut tunngatillugu oqaaseqarusunngilanga. Tusatsiagarli taannarpiaq ilumuunnginnerarusuppara. Blok 5-imi toqutsineq inupilunnut attuumassuteqanngilaq, taanna KNR-imut oktobarimi 2024-mi erseqqissumik oqarpoq.
Unnerluussisussaatitaasut piffissap qanoq ilinerani taama pisoqarsimanera pisumullu tunngasut allarpassuit, 42-nik ukiulik nassuiaateqarusussappat ilisimannittullu 14-it eqqartuussinermi ulluni tallimani sivisussuseqartussami nassuiaateqareerpata sukumiinerusumik paasisaqarfigissallugit neriuutigaat.
Unnerluussisussaatitaasut ilisimannittut 14-iusut tassaasut unnerluutigineqartumut pinerlineqartumullu ilisarisimannittut, politi aamma pinerlineqartup timaanik misissuisoq.
Nakuusersimasutut unnerluutigineqartoq
Unnerluussissummi immikkoortut aappaanni allaqqasut naapertorlugit, angutip arnaq kiinaatigut arlaleriarlugu juulimi 2024-mi patissimavaa ataasiarlunilu tillussimallugu.
Unnerluussissummi allaqqasut naapertorlugit Nuussuarmi najugaqarfimmi taama pisoqarpoq.
Unnerluussisussaatitaasut piumasaat akuerineqassappat, angut tarnikkut nappaatilinnut napparsimmavimmut Danmarkimiittumut inissiisarfimmiittussanngortitaassaaq, toqutaasullu ilaqutaannut arnamullu, unnerluussut naapertorlugu nakuuserfigineqarsimasumut, taarsiisussanngortinneqassalluni.
Eqqartuussutip apriilip naanerani oqaatigineqarnissaa naatsorsuutigineqarpoq.
